Пүрэв гарагт АНУ-ын агаарын орон зайд анх харагдсан Хятадын агаарын бөмбөлгийг АНУ-ын арми тагнуулын зорилгоор хөөргөсөн гэж Вашингтон мэдэгдсэн юм.
Тэгвэл тагнуулын зорилготой гэж байсан энэхүү бөмбөлөгийг АНУ-ын агаарын хүчнийхэн устгаж унагажээ. Бөмбөлөг Атлантын далайд унасан бөгөөд түүний хэлтэрхий хэсгүүдийг судлах зорилгоор гаргаж авахаар төлөвлөж байна.
Эх сурвалжийн мэдээлснээр Америкийн F-22 сөнөөгч онгоц АИМ-9 пуужингаар агаарын хөлгийг сөнөөсөн байна.
Америкт анхнаасаа л энэ нисдэг биетийг унагаах уриалга гарч байсан ч цэргийнхэн хүлээзнэж байв. Учир нь бөмбөлөг иргэний агаарын тээврийн орон зайн коридорын дээгүүр байсан бөгөөд аюул учруулахгүй, харин түүний хэлтэрхий газарт унавал эрсдэлтэй гэж үзэж байсан юм.
Блинкен 2-р сарын 5-6-ны хооронд Бээжинд айлчилж, олон улсын аюулгүй байдал, Тайвань, Ковид зэрэг олон чухал асуудлуудыг хэлэлцэхээр төлөвлөж байсан ч "тагнуулын бөмбөлөгтэй" холбоотойгоор айлчлалаа цуцлаад байна.
Асуудал нэг бөмбөлөгөөр хязгаарлагдахгүй бололтой. Пентагон Латин Америкийн дээгүүр Хятадын өөр нэг "тагнуулын бөмбөлөг" харагдсан гэж мэдээлэв.
Америкийн талын мэдээлснээр, Хятадын бөмбөлөг Аляск, Канадын нутаг дээгүүр өндөрт өнгөрч, улмаар цөмийн цэнэгт хошуу тээвэрлэх чадалтай Америкийн баллистик пуужингийн харвах полигон байрладаг Монтана мужийг чиглэсэн байна.
Энэ нь Америкийн удирдлагын дургүйцлийг хүргэсэн бөгөөд Энтони Блинкен хэлэхдээ, Хятадын "тагнуулын бөмбөлөг" манай агаарын орон зайд нэвтэрсэн нь АНУ-ын бүрэн эрх, олон улсын хууль тогтоомжийг илт зөрчсөн хариуцлагагүй алхам гэжээ.
Агаарын бөмбөлөгийн асуудлаар Бээжин удаан хугацаанд чимээгүй байсан ч баасан гарагт энэ нь үнэхээр өөрийн агаарын бөмбөлөг байсан, гэхдээ тагнуулын биш, харин цаг агаарын таагүй байдлаас болж замаасаа хазайсан цаг уурын бөмбөлөг байсан гэжээ.
Мөн бямба гарагт тус улсын ГХЯ-ны албан ёсны мэдэгдэлд Хятад улс "тусгаар тогтносон улс орнуудын нутаг дэвсгэр, агаарын орон зайд хэзээ ч халдаж байгаагүй" гэж тэмдэглэжээ.
Эх сурвалж: ВВС