Ерөнхийлөгч У.Хүрэлсүх Монгол Улсын төрийн тэргүүнээр сонгогдсоноосоо хойш УИХ-аас баталсан хуульд анх удаа хориг тавилаа.
Ердөө гурав хоногийн дотор УИХ-д өргөн баригдаж, батлагдсан Олон нийтийн сүлжээнд хүний эрхийг хамгаалах тухай хууль цахим орчинд хүний эрхийг хамгаалах бус харин үг хэлэх, үзэл бодлоо илэрхийлэх эрхийг нь боомилж байна хэмээн хуульч, хүний эрхийн төлөө тэмцэгч, иргэний нийгмийн байгууллагын төлөөлөл хүчтэй эсэргүүцэл илэрхийлж, хуульд хориг тавих асуудлаар иргэдийн гарын үсэг цуглуулж, хэлэлцүүлэг зохион байгуулсан
Нэгдүгээр сарын 20-ны өдөр намрын ээлжит чуулганы хаалтын өдөр яаран баталсан уг хуульд Ерөнхийлөгч У.Хүрэлсүх хориг тавих эсэх нь тодорхойгүй, удтал хүлээлгэсний эцэст дээрх хуульд бүхэлд нь хориг тавихаар болов.
Энэ талаар Ерөнхийлөгчийн Тамгын газраас өнөөдөр /2023.01.30/ мэдээлэл хийхдээ "Энэ хуулийг УИХ-д 2023 оны нэгдүгээр сарын 18-ны өдөр өргөн мэдүүлсэн. Хэлэлцэж эхэлснээс хойш хоёр хоногийн дотор баталсан. Энэ нь иргэд, олон нийтийн оролцоог хангаагүй. Ашиг сонирхол нь зөрчигдөж байгаа этгээдийн саналыг аваагүй нь Үндсэн хууль зөрчиж байна. Ерөнхийлөгч хуульд бүхэлд нь хориг тавьсан учраас хоёрдугаар сарын 1-нээс хууль хэрэгжихгүй" гэв.
Ерөнхийлөгч хориг тавьснаар тус хууль шууд хүчингүй болчихгүй. УИХ хоригийг хүлээж авах эсэхээс хойшдын хувь заяа нь хамаарна.
Хуульд Ерөнхийлөгч чуулганы үеэр хууль, УИХ-ын бусад шийдвэрт хориг тавьсан бол 14 хоногийн дотор хэлэлцэн шийдвэрлэхээр заасан. УИХ-ын намрын ээлжит чуулган завсарлаж, гишүүд тойрогтоо ажиллаж Төрийн ордон эл хуль байгаа энэ үед парламент хориг хэлэлцэх ажилтай болов.
УИХ-ын чуулганы хуралдааны дэгийн тухай хуульд Монгол Улсын Ерөнхийлөгчийн хориг хэлэлцэхийг дараах байдлаар тусгажээ. 88.1.Хууль, тогтоолд Монгол Улсын Ерөнхийлөгч хориг тавьсан бол Улсын Их Хурал хоригийг чуулганы үеэр ажлын 14 өдрийн дотор, чуулганы чөлөө цагт хориг тавьсан бол ээлжит болон ээлжит бус чуулган эхэлснээс хойш 10 хоногийн дотор хэлэлцэн шийдвэрлэж тогтоол батална.88.2.Монгол Улсын Ерөнхийлөгчийн хоригийг тухайн асуудлыг анх хэлэлцэж санал, дүгнэлт гаргасан холбогдох Байнгын хороо болон Хууль зүйн байнгын хороо хэлэлцэж санал, дүгнэлт гаргана.88.3.Нэгдсэн хуралдаанд хоригийг Монгол Улсын Ерөнхийлөгч, эсхүл түүний итгэмжлэгдсэн төлөөлөгч танилцуулсны дараа энэ хуулийн 88.2-т заасан Байнгын хорооны санал, дүгнэлтийг сонсоно.88.4.Байнгын хорооны болон нэгдсэн хуралдаанд гишүүд Монгол Улсын Ерөнхийлөгчийн хориг болон Байнгын хорооны санал, дүгнэлттэй холбогдуулан асуулт асууж, үг хэлж болно.88.5.Гишүүд энэ хуулийн 88.4-т заасны дагуу үг хэлсний дараа Монгол Улсын Ерөнхийлөгчийн хоригийг хүлээн авах эсэх асуудлаар ил санал хураалт явуулах бөгөөд хэрэв хууль, тогтоолын зарим хэсэгт хориг тавьсан бол тухайн зүйл, заалт нэг бүрээр санал хураалт явуулж дүнг танилцуулах бөгөөд хоригийг шийдвэрлэсэн талаарх Улсын Их Хурлын тогтоол баталсанд тооцно.88.6.Байнгын хорооны болон нэгдсэн хуралдаанд оролцсон гишүүдийн гуравны хоёр буюу 66.6 хувь нь Монгол Улсын Ерөнхийлөгчийн хоригийг хүлээж аваагүй бол хууль, тогтоол хүчин төгөлдөр үлдэнэ.88.7.Монгол Улсын Ерөнхийлөгчийн хоригийн талаар Хууль зүйн болон холбогдох Байнгын хорооны санал, дүгнэлт зөрвөл холбогдох Байнгын хорооны саналаар эхэлж санал хураалт явуулна.88.8.Монгол Улсын Ерөнхийлөгчийн хоригийг хүлээн авсан бол хууль, тогтоолыг бүхэлд нь буюу зарим хэсгийг нь хүчингүй болгох, шаардлагатай гэж үзвэл зохих нэмэлт, өөрчлөлт оруулах тухай хууль, тогтоолын төслийг хэлэлцэн баталж болно.88.9.Монгол Улсын Ерөнхийлөгчийн хоригийг хүлээж авсантай холбогдуулан хууль, тогтоолд нэмэлт, өөрчлөлт оруулах бол тухайн шийдвэрийн төслийг холбогдох Байнгын хороо боловсруулж нэгдсэн хуралдаанд оруулах бөгөөд уг төслийн талаар Засгийн газар, холбогдох бусад байгууллагаас санал авахыг шаардахгүй.
Эргэн сануулахад Монгол Улсын тав дахь Ерөнхийлөгч Х.Баттулга бүрэн эрхийнхээ хугацаанд УИХ-аас баталсан хууль, бусад шийдвэрт нийт 19 удаа хориг тавьсан байна.
Парламентад үнэмлэхүй олонхыг бүрдүүлж буй МАН Ерөнхийлөгчийн хоригийг хүлээж авах уу гэдгийг харах үлдлээ.
