Дэлхийн хавдартай тэмцэх өдөр жил бүрийн хоёрдугаар сарын 04-ний өдөр тохиодог.
Энэ өдөр дэлхий дээр хавдрын төрлийн өвчнөөр шаналж буй иргэдийн төлөө сайн санааны үйлс хийхийг уриалдаг. Учир нь жил бүр 8.2 сая хүн хавдар өвчнөөр хорвоог орхидог бол тэдгээрийн 4 сая нь 30-69 насандаа нас бардаг гэх тоо баримт бий.
Манай улс тус өдрийн хүрээнд “Чирэгдэлгүй хавдрын тусламж үйлчилгээ” хөтөлбөрийг 2022 оноос гурван жилийн хугацаатай хэрэгжүүлж эхэлсэн. 2023 оны зорилго нь хавдрыг даван туулж буй хүмүүс, тэдний хүрээлэл, нийгмийн бусад бүлгүүдийн дуу хоолойг нэгтгэх, эрх бүхий байгууллагуудад хавдрын асуудлыг чухалчлан авч үзэх нийтийн шаардлагыг таниулахад орших юм.
Хорт хавдрын шалтгааны 5-10% нь удамшил, генийн өөрчлөлттэй холбоотой байдаг бол 27% нь тамхи, архины хэрэглээтэй холбоотой байна. Хавдар нь хоргүй эсвэл хортой байдаг. Хоргүй хавдар нь биеийн тодорхой нэг хэсэгт байрлаж, түүнээс цааш тархдаггүй, амь насанд аюулгүй юм. Харин хортой хавдар нь ойролцоох эд эрхтэн рүү ургаж, биеийн бусад хэсэг рүү тархаж үсэрхийлж улмаар амь насанд аюул учруулдаг. Тиймээс хүн эрүүл хүнс хэрэглэж, хөдөлгөөн хийж, тамхи, согтууруулах ундаанаас татгалзаж, нарны хэт ягаан туяаны нөлөө, химийн бохирдуулагч бодис /асбет, пестицид, BPA агуулсан бүтээгдэхүүн гэх мэт/-оос зайлсхийж, дархлаагаа хамгаалж, хорт хавдрын талаар мэдээлэлтэй байвал хорт хавдраас сэргийлж, эрсдэлийг бууруулж чадна.