“iPhone”, “Mac”-ийн эрэлт тааруу байсан нь “Apple”-ийн борлуулалт буурахад нөлөөлөв
Дэлхийн эдийн засгийн удаашрал, нийлүүлэлтийн сүлжээний доголдол зэрэг нь технологийн салбарын тэргүүлэгчдийн нэг болох “Apple” компанид сөргөөр нөлөөлж байна. 2022 оны IV улиралд тус компанийн борлуулалт 5.5 хувиар буурч, 117.2 тэрбум ам.доллар болжээ.
Харин шинжээчид тус компанийг 121.1 тэрбум ам.долларын орлоготой ажиллана гэж таамаглаж байсан юм. Энэ нь 2019 оноос хойш “Apple”-ийн борлуулалт улирлын дүнгээр анх удаагаа буурсан тохиолдол болж байна.
Мөн 2015 оноос хойш анх удаа баярын улиралд тус компанийн борлуулалт шинжээчдийн таамагт хүрээгүй тохиолдол болов.
“Apple” компанийн тайлан шинжээчдийн хүлээлтэд хүрээгүйгээс пүрэв гарагт хувьцааны ханш нь 5.6 хувиар унасан байна. “Apple”-ийн борлуулалт буурахад “iPhone” болон “Mac”-ийн эрэлт буурсан нь гол жин дарж байгаа аж. Тухайлбал: “iPhone” гар утасны борлуулалт 65.8 тэрбум ам.доллар байсан нь шинжээчдийн таамаглаж байсан 68.3 тэрбум ам.доллароос доогуур үзүүлэлт боллоо.
Цар тахлын улмаас БНХАУ-д тогтоосон хөл хорионы улмаас “Apple”-ийн орлогын дийлэнх хувийг бүрдүүлэгч “iPhone” гар утасны нийлүүлэлт өнгөрсөн улиралд буурсан юм.