Түгжрэлийн асуудал хариуцсан сайд Ж.Сүхбаатарын энэ оны төсвөөс 2023 онд 800 шинэ автобус худалдан авч нийтийн тээврийн парк шинэчлэлтийг хийж дуусгах юм байна.
Нийслэл өнгөрсөн онд 224 автобус худалдан аваад байгаа ч нийтийн тээврийн ихэнх автобусны насжилт, дууссан учраас ийм хэмжээний автобус шинээр авах шаардлага үүссэн. Улаанбаатарт нийт 124 чиглэлд 1432 автобус хэрэгтэй гэсэн тооцоо бий.
Монгол Улсын Сайд, төвлөрөл сааруулах, түгжрэлийн эсрэг Үндэсний хорооны дарга Ж.Сүхбаатарт “Нийслэлийн нийтийн тээврийг 100 хувь шинэчлэх зорилт тавьсан. Одоо 800 гаруй шинэ автобус авах шаардлагатай байгаа. Ерөнхий сайд 2023 оны есдүгээр сарын 1 гэхэд нийтийн тээврийн парк шинэчлэлийн ажлын гол хэсгийг дуусгах үүрэг өгсөн. Тиймээс ирэх есдүгээр сар гэхэд 800 автобус авна гэж төлөвлөж байна. Нийслэл өнгөрсөн онд 224 автобус шинээр авсан. Би 800-г авчихвал 1200 болоод 100 хувийн парк шинэчлэл хийгдэх боломжтой болно” гэсэн юм.
Өнөөдөрийн байдлаар Улаанбаатар хотод 17 компанийн 980 орчим автобус 105 чиглэлд явж байна. Тэгвэл эдгээр автобусны 90 гаруй хувь нь ашиглалтын хугацаа хэтрээд байгаа. Зуны улиралд ажлын өдрүүдэд 300-350 мянга, намар оргил ачааллын үед өдөрт 700 мянга гаруй хүн нийтийн тээврээр зорчдог бөгөөд нийтийн тээврийн парк шинэчлэлийг 2024 он хүртэл 2 үе шаттай хэрэгжүүлэх юм.
