2022 оны дөрөвдүгээр сарын 4-нд Монгол улсын засгийн газраас Украин улсад 200,000 ам.долларын хүмүүнлэгийн тусламж үзүүлэх шийдвэр гаргаж байсан. Гэвч эл тусламжийн мөнгө алга болсон, зорьсон газраа хүрээгүй гэх мэдээллүүд гарсаар байна.
Харин энэ тухай ерөнхий сайдын зөвлөх Ч.Болортуяа тайлбар өгчээ. Тодруулбал, Украинд өгөх тусламжийн мөнгийг 2022 оны тавдугаар сарын 25-нд холбогдох байгууллагууд руу шилжүүлсэн юм байна. Ингэхдээ 150,000 ам.долларыг НҮБ-ын Онцгой байдлын тусламжийн төв сан (CERF), 50,000 ам.долларыг Олон улсын улаан загалмай, Улаан хавирган сар нийгэмлэгүүдийн холбоогоор дамжуулан өгсөн байна. Эдгээр байгууллага руу Засгийн газрын нөөц сангаас нийт 200,000 ам.долларыг шилжүүллээ.