Холбооны Нөөцийн банк бодлогын хүүг өсгөх хурдаа сааруулав
Лхагва гарагт болсон мөнгөний бодлогын хурлаар АНУ-ын Холбооны Нөөцийн банк бодлогын хүүгээ 0.25 нэгж хувиар өсгөж, 4.5-4.75 хувийн түвшинд хүргэв.
Инфляцыг Төв банкны зорилтот түвшин болох хоёр хувьд авчрахын тулд бодлогын хүүг дунд хугацаанд өндөр түвшинд хадгалж, дахин хэд хэдэн удаа өсгөхөөр байгааг Холбооны Нөөцийн банкны тэргүүн Жером Пауэлл мэдэгдэлдээ дурджээ. Тэрбээр мөнгөний хатуу бодлогоо сулруулахаас өмнө дахин хэд хэдэн удаа бодлогын хүүг өсгөхөөр байна гэж мэдэгдэж байв. 12 дугаар сарын хурлаараа Холбооны Нөөцийн банк бодлогын хүүг мөн адил 25 суурь нэгжээр өсгөсөн бол түүнээс өмнө дөрөв дараалан 75 суурь нэгжээр өсгөсөн юм.
АНУ-ын Төв банк бодлогын хүүг цаашид өсгөх дохио өгсөн ч Жером Пауэлл үнийн өсөлт саарч байгааг тодотгосон нь хөрөнгө оруулагчдын анхаарлыг татаж байна.
Мөн тэрбээр “Сүүлийн саруудын инфляцын үзүүлэлт эерэг хүлээлт бий болгож буй ч энэ онд бодлогын хүүг бууруулна гэж үзэхгүй байгаа”-гаа онцолжээ.
Холбооны Нөөцийн банкны тэргүүн Жером Пауэлл “Бид бодлогын хүүгээ 4.5 хувиар өсгөөд байна. Эдийн засгийн идэвхийг “хөргөх” түвшинд хүртэл бодлогын хүүг дахиад хэд хэдэн удаа өсгөх хэрэгтэй байж магадгүй. Учир нь инфляц өндөр түвшинд хадгалагдсан хэвээр байна. Мөн урт хугацааны эдийн засгийн төлөвийг ч олон янзаар төсөөлж, харгалзан үзэж байна. Инфляцыг тооцоолохдоо бид гурван хүчин зүйлийг харгалздаг. Одоогоор бодлогын хүү үйлчилгээ болон үл хөдлөх хөрөнгийн салбарт хараахан нөлөөлж эхлээгүй байна” гэж мэдэгдлээ.