Бүгд Найрамдах намын эмэгтэй улс төрч Ники Хэйли 2024 оны АНУ-ын ерөнхийлөгчийн сонгуульд нэрээ дэвшүүлэхээр болжээ.
Өмнөд Каролина мужийн захирагч асан Хэйли хоёрдугаар сарын 15-ны өдөр Чарльстон хотод болох арга хэмжээний үеэр энэ тухай албан ёсоор зарлахаар төлөвлөж, дэмжигчдэдээ урилга илгээснийг холбогдох эх сурвалж өнөөдөр мэдээлсэн байна.
Одоо 51 настай тэрбээр зургаан жилийн хугацаанд Өмнөд Каролина мужийн захирагчаар ажилласныхаа дараа Трампын засаг захиргааны үед АНУ-ыг НҮБ-д төлөөлөн ажиллаж байжээ.
Одоогоор Бүгд Найрамдах намаас 2024 оны сонгуульд өрсөлдөх шийдвэрээ зарласан ганцхан улс төрч байгаа нь экс ерөнхийлөгч Дональд Трамп юм.
Ники Хэйли 2018 онд НҮБ-ын албан тушаалаас сайн дураараа буухад түүнийг 2020 оны сонгуульд өрсөлдөж магадгүй тухай цуурхал тарж байв.
2021 оны нэгдүгээр сарын 6-нд Капитолын ордонд гарсан үймээн самууны дараа Трампын улс төрийн ирээдүйд эргэлзэж байгаагаа Хэйли илэрхийлсэн ч 2024 онд түүнтэй өрсөлдөх бодолгүйгээ хэлж байжээ.
Гэхдээ сүүлд сонгуульд өрсөлдөх эсэх талаараа дахин сайтар бодох тухай ярьсан байдаг.
Өмнөд Каролина мужийн Бамбэрг хотод 1972 онд төрсөн Хэйлигийн эцэг эх нь Энэтхэгийн Пунжаб мужаас АНУ-д цагаачилж ирсэн хүмүүс юм.
Хоёр хүүхдийн ээж тэрбээр Клемсоны их сургуулийг нягтлан бодох, бүртгэлийн мэргэжлээр төгсөж байжээ.
Эх сурвалж: Associated Press
