Хууль зүй, дотоод хэргийн сайд Х.Нямбаатар өнгөрсөн оны есдүгээр сарын 20-нд Мета компанийн Ази, Монгол, Хятадыг хариуцсан захирал Жорж Чентэй уулзах үеэрээ Олон нийтийн сүлжээнд хүний эрхийг хамгаалах хуулийн талаар санал солилцож, хамтран ажиллахаар болсон гэж Твиттертээ жиргэсэн байсан. Тэгвэл түүний жиргээг "Mета"-ын Ази, Монгол, Хятадыг хариуцсан захирал Жорж Чен үгүйсгэж, худлаа гэж мэдэгдсэн юм.
Энэ асуудалд Хууль зүй, дотоод хэргийн сайд Х.Нямбаатар уг асуудлаар тайлбар өглөө.
Тэрээр "Би "Mета"-ын Ази, Монгол, Хятадыг хариуцсан захирал Жорж Чен гэдэг нөхрийг ажлаас нь чөлөөлж өгнө үү гэдэг албан бичгийг ирэх даваа гаригт Мета компанид явуулах гэж байгаа. Тэр хүн надтай уулзсан, хуулийн орчуулга өгсөн, хамтарч ажиллая, арваннэгдүгээр сард Ажлын хэсгээ ирүүлье гэсэн. Хуулийн болон техникийн ажлын хэсгээ ирүүлнэ гэсэн. Гэтэл "Its not true" гээд намайг хамгийн худалч хүн гэж хэлж байна лээ ш дээ. Түүний надтай уулзсан 2.30 цагийн хурлын протокол, аудио бичлэг бий. Тэр үеэр мань нөхөр харин ч айхтар, айхтар зүйлс ярьсан шүү. Энэ хувь хүний асуудал биш. Бүхэл бүтэн туурга тусгаар улсын төрийн яамыг олон нийтийн мэдээллийн хэрэгслээр илтэд гүтгэж, дайрах нь байж болохгүй зүйл. Хоёрт, Мета компани улс орны дотоод хэрэгт оролцох ёсгүй. Гэтэл оролцохын дээдээр оролцсон. Манай улсын төрийн зарим албан хаагч руу дарамталсан мэйл явуулсан, манай улсыг хоригт оруулж, АНУ-ын зүгээс шахалт дарамт үзүүлнэ гэсэн мэйлүүд явуулсан. Би Жорж Чен гэдэг нөхрийг ажлаас нь чөлөөл гэдэг хүсэлтийг явуулна. Хоёрт, надаас уучлалт гуй гэдэг зүйлийг хэлнэ. Уулзсан бүх протокол, бичлэгийг завсаргана. Уучлалт гуйхгүй бол би шүүхэд хандана" гэлээ.
