Монголбанк: 2022 онд төлбөрийн тэнцлийн алдагдал буурч, $727.31 сая болсон. Сүүлийн хоёр сар дараалан төлбөрийн тэнцэл ашигтай гарч ГВАН 600 гаруй сая ам.доллароор нэмэгдээд байна
Төлбөрийн тэнцлийн алдагдал 2022 оны гүйцэтгэлээр буурч, 727.31 сая ам.доллар боллоо. Төлбөрийн тэнцлийн алдагдал жилийн дүнгээр буурахад 2022 оны 12 дугаар сард 470 орчим сая ам.долларын ашигтай гарсан нь голлох нөлөө үзүүлсэн байна.
Сүүлийн хоёр сар дараалан төлбөрийн тэнцэл ашигтай гарч гадаад валютын албан нөөц 600 гаруй сая ам.доллароор нэмэгдэж, 3.39 тэрбум ам.доллар хүрснийг Монголбанк мэдээллээ.
12 дугаар сард урсгал данс 195.27 сая ам.долларын алдагдалтай гарахад тээвэр, аялал зэрэг үйлчилгээний салбарын дансны тэнцэл 437 сая ам.долларын алдагдалтай гарсан нь гол нөлөө үзүүлжээ.
Хөрөнгийн данс 19.53 сая ам.долларын ашигтай гарсан бол санхүүгийн данс 608.3 сая ам.долларын алдагдалтай гарсан байна.
