Хөгжлийн банкны УИХ-ын хянан шалгах түр хороо нотлох баримтыг шинжлэн судлах сонсголдоо Ерөнхийлөгч асан Х.Баттулгыг гурван хүүхдийнх нь хамт гэрчээр дуудсан билээ. Тодруулбал, Ерөнхийлөгч асан Х.Баттулгыг ХХААХҮ-ийн сайд хийж байсных нь хувьд, гурван хүүхдийг нь Түмэнхишигтэн ХХК-ийн хувьцаа эзэмшигчийн хувьд дуудсан аж.
Энэ талаар Түр хорооны дарга Б.Энхбаяр "Сонсголоор Хөгжлийн банкнаас санхүүжүүлж, улсын төсөвт суулгасан Засгийн газрын төсөл хөтөлбөрийг багцыг хэлэлцэнэ. Энэ нь зээл биш бөгөөд 2012-2016 онд эргэн төлөх нөхцөлтэйгөөр санхүүжүүлсэн 350 орчим төсөл арга хэмжээ бий. Эдгээр төсөлтэй холбогдуулан 43 гэрч дуудаж байна. Үүнд, ЭЗХ-ийн сайд асан Н.Батбаяр, Молор констракшн ХХК-ийн хувьцаа эзэмшигч С.Эрдэнэ, ХХААХҮ-ийн сайд асан Х.Баттулга, Ерөнхий сайд асан Н.Алтанхуяг, Түмэнхишигтэн ХХК-ийн хувьцаа эзэмшигч Б.Намуун, Б.Номин, Б.Хүлэгт тэргүүтэй хүмүүс байна" гэсэн юм.
Тэгвэл Түмэнхишигтэн ХХК-ийн хувьцаа эзэмшигч Б.Намуун гэр бүлээ төлөөлөн мэдэгдэл гаргасан байна. Мэдэгдэлд Хөгжлийн банкнаас санхүүжүүлсэн төсөл хөтөлбөртэй холбоогүй, зээл аваагүй гэжээ.
