Үндэсний аудитын газраас “Коронавируст халдварын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хууль”-ийн хэрэгжилтэд шалгалт хийжээ.
Цар тахлын хуулийн хэрэгжилтийг шалгах явцад Ковид-19-ийн эсрэг 198.2 мянган хүн тун вакциныг устгаж, багагүй хэмжээний төсвийг үр ашиггүй зарцуулсан болох нь тогтоогдсон байна. Их хэмжээний вакциныг ашиглалгүй устгасан нь зохион байгуулалтаас шалтгаалсан гэж дүгнэсэн аж. Цар тахлын үед нэр бүхий хувийн эмнэлэг Спутник-V вакцины 2 тунг иргэдэд тарихдаа 120 мянган төгрөгөөр төлбөр авч байсан. Тэгэхээр устгалд орсон 198 мянган тун вакциныг худалдаж авсан зардал хэдэн тэрбумаар хэмжигдэнэ гэсэн үг.
Засгийн газраас ВероСелл, Астра Зенека, Файзер, Спутник-V гэсэн 4 төрлийн вакцинаар иргэдийг дархлаажуулсан. Дээрх 4 төрлийн вакцины нэгжийн үнэ хэдэн төгрөг байсан мөн төрөл бүрээс ямар хэмжээгээр устгалд орсон бэ гэдгийг нарийн тооцсон мэдээллийг Үндэсний аудитын газрын тайланд дурдаагүй бөгөөд ерөнхийд нь 198.2 мянган тун вакциныг устгасан гэдэг мэдээллийг өгөөд байгаа юм.
Үүнээс гадна вакциныг хадгалах, хамгаалах, тээвэрлэх үеийн холбогдох анхан шатны баримтын бүрдэл, хөтлөлт хангалтгүй, вакцины зарцуулалт болон цахим бүртгэлийн тоон мэдээлэл зөрүүтэй байсан нь гүйцэтгэлийн аудитын шалгалтаар тогтоогдсон байна.
Г.Жав
Эх сурвалж: Toim.mn
