Гадаад харилцааны сайд Б.Батцэцэг өчигдөр хэвлэлийнхэнтэй уулзаж 2022 оны ажил болоод 2023 оны зорилтуудаа танилцуулав. Энэ онд явах болон хүлээж авах 40 гаруй айлчлал төлөвлөжээ. Өдөр судраа талууд эцэслэн тохирсны дараа айлчлалуудыг албан ёсоор мэдээлнэ. Цар тахлын дараа улсын эдийн засгийг сэргээх ажилд дипломат алба чухал үүрэгтэй оролцох ёстой.
Засгийн газраас 2023-2025 оныг Монголд зочлох жил болгон зарласан тул хийх ажил мундахгүй их. Дипломат албаны нэр хүндийг шороотой хутгасан хэнбугатай ч эвлэрэхгүй, хатуу хариуцлага тооцно гэж салбарын сайд онцолсон.
Ерөнхийлөгч асан Н.Энхбаяр Улаанбаатарт суугаа гадны ЭСЯ-дууд руу ҮХНӨ-ийн төслийг хүргүүлсэн нь гайхаш төрүүлсэн. Энэ талаар зарим орны ЭСЯ-наас ГХЯ руу хандаж лавлажээ. ГХЯ Үндсэн хуулийн тэрхүү төсөл Засгийн газрын байр суурь биш гэсэн хариуг албан ёсоор өгсөн байна.