БНХАУ-ын 2022 оны төсвийн алдагдал цар тахлын эхэн үеийн буюу 2020 оны алдагдлыг давжээ
2022 онд БНХАУ-ын төсвийн алдагдал 1.3 их наяд ам.доллар давсан нь шинэ дээд үзүүлэлт боллоо. Энэ нь Covid-19-ийг Үл тэвчих бодлогын үр нөлөөг бууруулах төсвийн арга хэмжээ нь орон нутгийн засаг захиргаануудад санхүүгийн дарамт учруулсныг харуулж байна.
Тухайлбал: тус улсын төсвийн нийт алдагдал 8.9 их наяд юань давснаар орон нутгийн захиргаануудын төсөв хүндхэн байдалд ороод байна. Ингэснээр Бээжин эдийн засгаа дэмжихээр төсвийн зарцуулалтаа нэмэхээс болгоомжилж магадгүй боллоо.
БНХАУ-ын 2022 оны төсвийн нийт алдагдал цар тахлын эхэн үеийн буюу 2020 оны алдагдлыг давсан аж. Түүнчлэн 2021 оноос 51 хувиар өндөр байгааг “Bloomberg”-ийн шинжээчид тус улсын Сангийн яамны мэдээлэлд үндэслэн тооцоолжээ.
Өнгөрсөн онд БНХАУ-ын эдийн засаг гурван хувиар тэлэхэд Засгийн газрынх нь зарцуулалт голлон нөлөөлсөн байна. Түүнчлэн бизнесүүдэд дэмжлэг үзүүлэхээр татварын хөнгөлөлт олгосон нь төсвийн орлого буурахад нөлөөлжээ.
2022 онд БНХАУ-ын төсвийн алдагдал дотоодын нийт бүтээгдэхүүнийх нь 7.4 хувьтай тэнцсэн байна. Төсвийн алдагдлын дотоодын нийт бүтээгдэхүүнд эзлэх хувь 2020 оныхоос доогуур байгаа юм.
