Олон нийтийн сүлжээнд хүний эрхийг хамгаалах тухай хуульд Ерөнхийлөгч бүхэлд нь хориг тавьсан асуудлаар Ерөнхийлөгчийн Тамгын Газраас өнөөдөр мэдээлэл хийлээ.
"УИХ-аас олон нийтийн сүлжээнд хүний эрхийг хамгаалах тухай хууль үүнийг дагалдуулан нэр бүхий дөрвөн хуульд өөрчлөлт оруулсан. Эдгээр хуулиудад Ерөнхийлөгч бүхэлд нь хориг тавьж байна.
Гэхдээ манай улсад сүүлийн үед цахим орчинд өсвөр насны хүүхдүүдийг хүчирхийлэл, садар самуунд уриалах, хүний нэр төрд зохион байгуулалттайгаар халдах зэрэг гэмт хэргүүдийг бууруулах, хууль бус үйлдлүүдтэй зайлшгүй тэмцэх шаардлага бий. Цаашид УИХ, Засгийн газар энэ чиглэлд анхаарлаа хандуулах нь зүйтэй гэж үзэж байгаа.
Цахим орчинд цацагдаж буй олон хууль бус үйлдлүүд нь иргэдийн эрх, эрх чөлөөг зөрчиж байгааг иргэд ихээхэн ярьж, хэлэлцэж байна. Тиймээс олон нийтийн санал бодлыг сонсож, мэргэжлийн байгууллагуудын дүгнэлтийг нэгтгэж, олон улсын сайн туршлагуудыг тусган эрх зүйн орчныг боловсронгуй болгох зайлшгүй шаардлага байгааг тодотгож хэлье" хэмээн Ерөнхийлөгчийн Тамгын Газрын дарга Я.Содбаатар мэдээлэв.
Тэрбээр сэтгүүлчдийн асуултад хариулав.
- Олон нийтийн сүлжээнд хүний эрхийг хамгаалах тухай хуулийг дагалдан таван хуульд хориг тавигдаж байна.
- ҮАБЗ-ийн хурлаар Олон нийтийн сүлжээнд хүний эрхийг хамгаалах тухай хуулиудтай холбогдуулан ямар нэг шийдвэр гаргаагүй.
- Хуулиудад бүхэлд нь хориг тавьж байгаа нь цахим орчинд явагдаж байгаа хууль бус зүйлүүдийг зөвтгөж байгаа юм биш.
- Олон нийтийн сүлжээнд гарч байгаа хууль бус зүйлүүдийн хууль эрх зүйн орчныг боловсронгуй болгох чиглэлээр олон арга хэмжээг хийх зайлшгүй шаардлага гарч байгаа. Гэхдээ Үндсэн хууль, хууль тогтоомжийн болон холбогдох хуулийн хүрээнд хуулиа батлах ёстой.
- Олон нийтийн сүлжээнд хүний эрхийг хамгаалах тухай хуульд хориг тавьсан учир заалт бүрээр байр сууриа илэрхийлэх боломжгүй.
- Гуравдугаар сарын 15-нд УИХ-ын хаврын чуулган эхэлнэ. Хаврын чуулган эхэлснээс 14 хоногт энэхүү хоригийг хэлэлцэх ёстой. Ерөнхийлөгчийн хоригийг хүлээж авах эсэх нь УИХ-ын бүрэн эрхийн асуудал.
- Олон нийтийн сүлжээнд хүний эрхийг хамгаалах тухай хуульд бүхэлд нь хориг тавьж буй тул хоёрдугаар сарын 1-нээс хууль хэрэгжих хугацаа нь түдгэлзэнэ, хэрэгжихгүй.
- Агаарын бохирдлын асуудлыг Засгийн газар хариуцдаг.
- Хувь хүний эрх, эрх чөлөө бусдын эрх чөлөөгөөр хязгаарлагдахыг Үндсэн хуульд заасан байдаг. Сошиал орчинд байр сууриа илэрхийлэхдээ энэ заалтуудыг онцгой анхаарч үзээсэй гэж хүсэж байна.