Америкийн хууль тогтоогчид Нетфликс компанид хандан өсвөр насныханд зориулсан видео контентууд дахь тамхины далд сурталчилгааг хязгаарлахыг анхаарууллаа.
Зөвхөн Нетфликс гэлтгүй Холливудын олон бүтээлд өсвөр насныхан руу чиглэсэн тамхи далд сурталчилгаа хүчтэй байдаг. Энэ нь кино продюсерууд төсвөө босгохдоо тамхины компаниудаас санхүүжилт татдагтай холбоотой талаар өчүүхэн би бээр “Амьдрал яг л Токиогийн түүх шиг” нийтлэлдээ өмнө хөндөж байсан билээ.
Үнэхээр тамхи татах хүсэл төртөл уушгилж, зүйрлэшгүй таашаал авч буй мэтээр харуулдаг сценүүд нь өсвөр насныхан гэлтгүй насанд хүрэгчдэд ч хүчтэй нөлөө үзүүлэх нь илэрхий байдаг. Тэгвэл АНУ-ын Сенатын гишүүд болох Э.Маркей, К.Холлен, Р.Блументаль нар Нетфликс компанийн удирдлагуудад хандан ил захидал илгээжээ.
Захидалд нийгмийн эрүүл мэндийн төлөөх “Truth Initiative” ТББ-ын мэдээллээс эш татсан байх бөгөөд тус компанийн 2020 онд дэлгэцэд гаргасан “The Queen’s Gambit”, “The Umbrella Academy” хэмээх өсвөрийнхөнд зориулсан coming of age жанрын хоёр бүтээлд л гэхэд тус бүрд нь янжуур болон электрон тамхи татаж буй 200 гаруй удаагийн дүрс цацагдсан байна.
Энэ нь бусад кино сувгуудын сүүлийн дөрвөн жилийн тамхины далд сурталчилгаанаас давсан үзүүлэлт болохыг сануулж, залуусын эрүүл мэндийн төлөө шийдвэртэй арга хэмжээ авахыг шаарджээ. Аль 2019 онд энэхүү шүүмжлэл анх өрнөсний дагуу Нетфликс компани тодорхой хязгаарлалт тогтоохоор амлаж байсан ч өнөөдрийг хүртэл дорвитой алхам хийгээгүй юм.
Тиймээс сенаторууд тус компанийг 4 дүгээр сарын 21-ний дотор тамхины далд сурталчилгааг хязгаарлах чиглэлээр гаргасан шийдвэр, авч хэрэгжүүлсэн ажил, арга хэмжээнийхээ талаар мэдээлэхийг үүрэгдэж, үгүй бол хууль тогтоох эрх мэдлийнхээ хүрээнд дараагийн шатны алхмыг авах болно гэжээ.