Дэлхийн бөмбөрцгийн өөр өөр хэсэгт байгаа экосистемүүд төсөөлж байснаас илүү хоорондоо хамааралтай болохыг шинэ судалгааны үр дүн харуулсан байна. “Nature Climate Change” сэтгүүлд саяхан нийтлэгдсэн судалгааны тайланд эрдэмтэд дэлхийн агаар мандлын урсгалын шинэ замыг нээснээ зарлажээ.
Уг урсгал нь Өмнөд Америк тивийн Амазоны ширэнгэд үүсэж, Атлантын далайн өмнөд хэсэг, дорнод Африк, Ойрх Дорнодоор дамжин Ази тивийн төв хэсэгт хүрдэг юм байна. Дэлхийн бөмбөрцгийг ороон 20,000 км үргэлжилсэн энэ холбоос нь Амазоны ширэнгэ халахад Төвөдийн өндөрлөг ч бас халдаг гэсэн үг юм.
Энэхүү нээлт нь аль нэг экосистемд гамшиг нүүрлэхэд дэлхийн бусад экосистемүүдэд цуварсан гамшиг үүсэх нөхцөл болдгийг тогтоожээ.
“Бид энэ хэлхээ холбоог нухацтай авч үзэх ёстой. Дэлхийн бөмбөрцгийн экосистемүүдийн сүйрэл харилцан нэг нэгнээ өдөөж, ноцтой үр дагаварт хүргэж болзошгүй юм” гэж судалгаанд оролцсон Потсдамын Уур Амьсгалын Нөлөөллийн Судалгааны хүрээлэнгийн эрдэмтэн Ханс Йоахим Шеллнхубер ярьж байна. Эрдэмтэд дэлхийн алслагдсан экосистемүүдийн хоорондын хамаарлыг дөнгөж судалж эхэлж байгаа нь энэ юм. Ийм судалгаа дэлхийн уур амьсгалын өөрчлөлтийн нөлөөг бүрэн таньж ойлгоход чухал гэгдэж байна.
Дэлхийн хамгийн том ой ширэнгэ, нийт хуурай газрын амьтны төрөл зүйлсийн дөрөвний нэгийг агуулдаг Амазоны хэмжээ өнгөрсөн онд сүүлийн 15 жилд байгаагүй хурдтайгаар агшсан юм. Үүнд хүмүүсийн мод огтлох үйл ажиллагаа, ой хээрийн түймэр гол нөлөө үзүүлж байна.
Хималайн нуруу бол дэлхийн хамгийн том цэвэр усны нөөцүүдийн нэгийг агуулдаг. Уур амьсгалын өөрчлөлтийн улмаас эндхийн мөс, мөнх цас жилээс жилд хайлж, хэмжээ нь багассаар байгаа билээ.