Цахим орчныг цэгцлэх ёстой юу гэвэл тийм. Гэхдээ хэрхэн яаж вэ гэдгийг судалгаа шинжилгээн дээр үндэслэн хийх ёстой. Гэтэл хэдэн гэмт хэргийн мэдээн дээр үндэслээд цахим хөгжлийн яам нь өөрсдийн үзэмжээр шийдчсэн нь олны дургүйцийг дээд цэгт нь хүргээд байна.
Олон нийтийн сүлжээнд хүний эрхийг хамгаалах тухай хуульд ХЭҮК-оос ямар ч санал авахгүй гэнэ.
Энэ тухай ХЭҮК-ын референт Б.Галбаатар “ХЭҮК-оос санал аваагүй. Нэгдүгээр сарын 17-ны өдөр зөвхөн эхний үндсэн төслөө танилцуулсан. Хүний эрхийг хязгаарлаж байгаа харилцаа холбооны тухай хуулийн нэмэлт кибер аюулгүй байдлын тухай хуулийн нэмэлтийг огт танилцуулаагүй байсан. Нэгдүгээр сарын 18-нд олон нийтэд өргөн барьсны дараа бүрэн хэмжээнд танилцсан гэсэн үг” гэжээ.
Хүний эрхийг хамгаалах малгайн дор хүний эрхийг хязгаарласан хуулийг богино хугацаанд баталсан үйл явдалд олон нийт шүүмжлэлтэй хандаж байна.
“Олон нийтийн сүлжээнд хүний эрхийг хамгаалах тухай хууль"-ийн талаар Хүний эрхийн үндэсний комиссын референт Б.Галбаатар “Цахим орчинд хүний эрхийг хамгаалах асуудал НҮБ-ын Хүний эрхийн зөвлөл, тусгай илтгэгчийн хүрээнд холбогдох зөвлөмж гаргасан байдаг. Үүний дагуу 2018 онд цахим орчин дахь контентыг зөвхөн шүүхийн шийдвэрээр хязгаарлах ёстой гэсэн байдаг. Нөгөө талаараа интернэттэй байх, интернэтийн чөлөөтэй хэрэглэх нь хүний эрх гэдгийг НҮБ-ын Ерөнхий Ассамблей тусгайлан тогтоол гаргаж, улс орнуудад зөвлөмж болгосон.
Тэгэхээр манайх хүний эрхийг дагаж мөрдөнө гэж байгаа бол дээр дурдсан олон улсын байгууллагын хүний эрхийн зөвлөмжийг дагаж мөрдөх ёстой. Гэтэл дээрх зөвлөмжүүдэд нийцэхгүйгээр манай хууль батлагдлаа гэж үзэж байна.
Контент гэдэг бол цахим орчинд үзэл бодлоо чөлөөтэй илэрхийлэх эрх чөлөө юм. Тэгэхээр контентыг хязгаарлах, цахим орчинд үзэл бодлоо илэрхийлэх эрх чөлөөг хязгаарлах хоёр шууд хамааралтай болж байна. Хүний эрх чөлөөг хязгаарлах арга хэмжээ авах эрхтэй ганц байгууллага бол шүүх юм. Гүйцэтгэх эрх мэдлийн байгууллага авах ёсгүй. Тэгэхээр шүүхийн хяналтаас гадуур энэ хуулийн процесс явах эрсдэлтэй.
Өөр нэг зүйл байгаа нь олон нийтийн дэг журмыг алдагдуулж болзошгүй, кибер халдлага гарч болзошгүй гэдэг үндэслэлээр зөрчилтэй контентын тархцыг бууруулах, харилцаа холбооны сүлжээг хязгаарлах арга хэмжээ авна гэдэг чинь интернэтийг хаах гэсэн үг шүү дээ. Болзошгүй гэх үндэслэлээр интернэтийг хязгаарлах нь хүний эрхийн хэмжээндээ нийцэшгүй болж байгаа юм. Үүнийг нийцүүлэх шаардлага байгаа” хэмээн IKON.MN сайтад байр сууриа илэрхийлжээ.
Б.Ирээдүй