Умард Атлантын /НАТО/ эвслийн орнуудаас Украинд зэвсэг нийлүүлбэл Орос хатуу хариу арга хэмжээ авахад бэлэн байна. Энэ тухай Вена хотод болж буй олон улсын хэлэлцээний үеэр ОХУ-ын Төрийн Думын депутат, Оросын төлөөлөгчдийн тэргүүн Константин Гаврилов мэдэгджээ.
Түүний хэлснээр, Вашингтон болон НАТО-гийн орнууд Киевт зэвсэг нийлүүлж, Оросын гүн рүү цохилт өгч, үндсэн хуулиар хамгаалагдсан газар нутгийг булаан авах оролдлого хийвэл Москва нэн даруй хариу өгөх болно гэв.
Европын Аюулгүй Байдлын Хамтын Ажиллагааны Байгууллага /ЕАБХАБ/-ын гишүүн орнуудын цэргийн аюулгүй байдал, зэвсгийн хяналтын асуудлаарх уулзалтын үеэр Оросын төлөөлөгч "Биднийг энэ тухай та бүхэнд урьдчилан анхааруулаагүй гэж дараа битгий хэлээрэй" гэж сануулжээ..
Чехийн армийн жанжин штабын дарга Карел Рзека өмнө нь НАТО болон ОХУ-ын хооронд цэргийн мөргөлдөөн гарсан тохиолдолд ЕХ-ны орнуудын арми "хүмүүс болон техник хэрэгслийг хэсэгчлэн дайчлах" шаардлагатай гэж мэдэгдэж байсан юм.
Эх сурвалж: Лента. ру
