АНУ-ын Үндэсний сансар судлалын агентлаг (НАСА) Батлан хамгаалахын дэвшилтэт судалгааны төслийн агентлаг (DARPA)-тай хамтран 2027 он гэхэд Ангараг гараг руу нисэх цөмийн пуужингийн хөдөлгүүрийг туршихаар төлөвлөж байна. Тус хоёр агентлаг Ангараг гараг руу анхны багийнхныг илгээх гол алхам болох цөмийн дулааны хөдөлгүүр дээр хамтран ажиллаж байгаагаа мягмар гарагт зарлалаа.
Энэ тухай тус газрын дарга Билл Нелсон "Манай улсын сансрын технологийн дараагийн томоохон бүтээн байгуулалт нь Ангараг гаригт хүрэх цөмийн пуужингийн дэвшилтэт хөдөлгүүр байх болно. Бидний зорилго бол 2027 он гэхэд цөмийн пуужингийн хөдөлгүүрийн амжилттай загвар бүтээж, харуулах явдал юм" гэж Нелсон хэлэв.
"Ердийн химийн хольц бүхий пуужингийн хөдөлгүүр нь сансрын нисгэгчдэд сансрын гүнд нислэг үйлдэх хамгийн үр дүнтэй хэрэгсэл биш юм. Цөмийн пуужингийн хөдөлгүүр нь илүү хүчтэй бөгөөд түүний үр ашиг нь өнөөгийн пуужингийн хөдөлгүүрээс 2-5 дахин өндөр байх болно" гэж хэлэв.
НАСА-гийн мэдээлснээр цөмийн пуужингийн хөдөлгүүрийн ажиллах зарчим нь дулааны эх үүсвэрийн үүрэг гүйцэтгэх цөмийн реактор бүхий халаалтын камер нь ажлын шингэнийг хий болгон хувиргаж, улмаар тийрэлтэт цохилт үүсгэдэг.
Цөмийн хөдөлгүүртэй пуужин ашиглах нь нислэгийн хугацааг багасгаж, сансрын нисгэгчдэд учрах эрсдлийг бууруулж чадна гэж НАСА мэдэгдлээ.
Эх сурвалж: Итар ТАСС болон Синьхуа