АНУ-ын засаг захиргаа Оросын хувийн зэвсэгт хүчний Вагнер Группийг “үндэстэн дамнасан гэмт хэргийн байгууллага” ангилалд албан ёсоор оруулснаа баасан гарагтзарласан.
Уг жагсаалтад Италийн мафи, Орос, Японы зохион байгуулалттай гэмт хэргийн бүлэглэлүүд багтдаг. Жагсаалтад багтсан байгууллагуудтай харилцсан бүх этгээд АНУ-ын эдийн засгийн хоригоор шийтгүүлдэг юм.
Бямба гарагт Вагнер Группийн тэргүүн Евгений Пригожин яагаад тус байгууллагыг ийм хоригт оруулах болсон талаар тайлбар өгөхийг шаардаж, АНУ-ын ерөнхийлөгчийн Цагаан ордон руу захидал илгээжээ.
Вагнерын хэвлэлийн албанаас нийтэлсэн богино хэмжээний захидалд “Эрхэмсэг ноён Кирби. Вагнер Групп ямар гэмт хэрэг үйлдсэн талаар тодруулна уу?” гэсэн байна.
Тэрбээр энэ захидлаа Цагаан ордны үндэсний аюулгүй байдлын зөвлөлийн нарийн бичгийн дарга Жон Кирбид хаяглажээ.
Баасан гарагийн мэдэгдэлдээ Кирби тус байгууллагад Украины дайнд ашиглах зориулалтаар Умард Солонгосоос сум хэрэгсэл нийлүүлсэн тухай баримтыг НҮБ-ын аюулгүй байдлын зөвлөлд танилцуулсан тухай дурдаж байв.
Вашингтоны эрх баригчид 2017 онд Вагнерт эхний эдийн засгийн хоригоо зарлаж байжээ.
Европын Холбоо 2021 оны арван хоёрдугаар сард мөн Вагнер Группийн эсрэг хориг арга хэмжээ зарлаж байсан юм.
Оросын хувийн зэвсэгт хүчний компани гэгддэг Вагнер Групп нь одоо Украины фронтод ОХУ-ын албан ёсны армитай зэрэгцэн тулалдаж байгаа.
Украинаас гадна Сири, Ливи, Төв Африкийн БНУ, Судан, Мозамбик, Мали улсуудад үйл ажиллагаа явуулдаг гэсэн баримт бий.
Пригожин хувийн компаниа өөрийн нисэх онгоц, танк, пуужин, их бууны системтэй, бүрэн бие даасан зэвсэгт хүчин болохыг өмнө нь мэдээлж байжээ.
Эх сурвалж: Reuters
