ТОСК хөдөлгөөнт цогцолбор төслийн зээлийг хэлэлцэж байна.
Ерөнхий сайд асан Ч.Сайханбилэгийн үед энэ зээлийг авчээ. Зээлийн гэрээг ТОСК-Батлан хамгаалах яамтай байгуулсан байна. Одоо зээлийн нийт үлдэгдэл 25.6 тэрбум төгрөг байна. Чанаргүй зээлийн ангилалд шилжжээ.
Батлан хамгаалах яамны Төрийн нарийн бичгийн дарга гадаадад томилолттой яваа тул сонсголд ирсэнгүй. Ерөнхий сайд Ч.Сайханбилэгтэй холбогдож чадаагүй аж. Мөн тухайн үед Сангийн сайд байсан Б.Болорт туслахаар нь дамжуулан мэдээлэл хүргүүлсэн ч тэрээр өнөөдрийн сонсголд ирсэнгүй.
Энэ зээлийг эдийн засгийн тооцоо судалгаагүй байхад зээл олгохыг дэмжин, Хөгжлийн банкны ТУЗ гүйцэтгэх захиралд гэрээ байгуулахыг зөвшөөрчээ.
Ерөнхий сайд асан Ч.Сайханбилэг АНУ-д айлчилсны дараа энэ гэрээг хийсэн аж. АНУ-ын батлан хамгаалах салбарт үйл ажиллагаа явуулдаг компанийн лоббигоор энэ зээлийг олгосон гэж үздэг юм. Энэ зээлийн хүрээнд АНУ-аас 7 хөдлөх бүрэлдэхүүн хүлээн авч, агуулахад лацтай чигээр нь зургаан жил хадгалжээ. Уг нь 9-ийг ирүүлэх ёстой. Эдгээр нь цэргийн зориулалттай биш тул хөдөө аж ахуйн салбарт ашиглах боломжтой аж. Эдгээрийг ашиглан агуулахын дээвэр нурууг хийх боломжтой аж.
Зээлийн эх үүсвэрээр бий болсон хөрөнгийг худалдах, ашиглах үүргийг Засгийн газраас Хөгжлийн банканд өгчээ.
Хөгжлийн банк, Батлан хамгаалах яам, ХХААХҮЯ-наас хамтарсан ажлын хэсэг байгуулж, зоорь болгон ашиглах уу, түрээслүүлэх үү гэх мэтээр эдийн засгийн эргэлтэд оруулах судалгаа хийж эхэлжээ. Гэвч хөдлөх бүрэлдэхүүнийг хэрхэн ашиглах гарын авлагыг ирүүлээгүй байна.
