Хөгжлийн банкны нотлох баримт шинжлэн судлах сонсголоор “Кью Эс Си” ХХК-ийн зээлийн асуудлыг хэлэлцэж байна. Тус компани нь Төмөртэйн орд, Хандгайт өртөө хүртэлх төмөр замын төсөлд 71.3 сая ам.долларын зээл 8 хувийн хүүтэй 2014 онд авсан. Дээд шүүхийн шийдвэрээр 191.2 тэрбум төгрөгөөр 2022 оны зургадугаар сард төлөгдөж, Хөгжлийн банкны хаагдсан зээлийн жагсаалтад орсон.
Эрдэнэт үйлдвэрийн 49 хувийг Худалдаа Хөгжлийн банк авахад энэхүү зээлийг зарцуулсан гэх шалтгаанаар хууль хяналтын байгууллагад шалгагдаж байснаар нь иргэд сайн мэддэг болсон зээл.
Шинжээчийн дүгнэлтэд, ТЭЗҮ бүрэн хийгдээгүй, зээлийн баталгаа бүрэн биш, зээлийн барьцаа хөрөнгө хуулийн шаардлагад хүрээгүй байхад олгосон. Мөн зээлийн зарцуулалтыг шалгахад, ХХБ дахь гурван зээлийн төлбөрийг хааж, ХХБ-ны өөрийн харилцах дансанд гүйлгээ хийх байдлаар 4 удаагийн гүйлгээгээр гаргасан. Гүйлгээг хөөж үзвэл зээлийн гэрээг зөрчиж, зээлийг зориулалтын бус зарцуулсан гэж үзэж байна гэв.
УИХ-ын гишүүн Б.Энхбаяр: Таны удирдлага дор ажиллаж байсан “Кью Эс Си” ХХК-д зээл олгох дүгнэлт гаргасан Актив, пассивын удирдлагын газрын ахлах мэргэжилтэн А.Бат-Оргил нь “Кью Эс Си” ХХК-ийн хамаарал бүхий этгээд төдийгүй ХХБ-ны үүсгэн байгуулагч Д.Эрдэнэбилэгийн төрсөн эгч Д.Алтанцэцэгийн төрсөн хүү гэдгийг та мэдэх үү
Хөгжлийн банкны захирал асан Н.Мөнхбат: Тэр талаар ямар ч мэдээлэл байхгүй.
УИХ-ын гишүүн Т.Доржханд: Та бүхэн концессоор эзэмшиж байгаа үйлдвэр, баяжмал, тоног төхөөрөмжийг барьцаалсан юм бэ. “Кью Эс Си” өөрийн барьцаалах хөрөнгө байгаагүй хэрэг үү. Цаасан дээрх компани байсан юм уу?
Хөгжлийн банкны Эрсдэлийн удирдлагын газрын дарга З.Батырбек: Тухайн үед Төмөртэйн ордын баяжмал, төмрийн хүдрийг, тоног төхөөрөмжийг барьцаалсан байдаг.
“Кью Эс Си” ХХК-ийн гүйцэтгэх захирал Э.Шижир: Энэ бол концессын гэрээнд заагдсан эрхүүдийн дагуу хийгдсэн. Хууль болоод гэрээний дагуу хийгдэж байсан ажилбар. Өөрөөр хэлбэл, Кью Эс Си ХХК-ийн нэр дээр тоног төхөөрөмж нь байсан. Харин баяжмал нь, үйлдвэрийн нэр дээр байсан ч манай компанийн техник тоног төхөөрөмжөөр гаргаж авсан бүтээгдэхүүн байсан. Тиймээс концессын гэрээний дагуу эрхийнхээ хүрээнд зээлийн барьцаанд тавьсан.
Сангийн сайд Б.Жавхлан: Барьцаа хөрөнгө, экспортын асуудал, концессоор хүлээсэн металлургийн үйлдвэрлэл барих зорилго зэргээс нь дүгнэлт хийгээд Засгийн газар концессын гэрээг цуцлах шийдвэр өнгөрсөн онд гаргасан. Саяхан Төрийн өмчийн Бодлого зохицуулалтын газар удирдаад концессын гэрээнүүдэд аудит хийсэн. Энэ талаар УИХ дээр мэдээлэл хийж, нийтэд мэдээлэл өгөх юм.
