Галзуугийн вакциныг андуурч хийсэн 9 иргэнийг Улаанбаатар хотод авчран эмчилж байгаа. Иргэдийн биеийн байдлын талаар ЭМЯ-ны Эмнэлгийн тусламж, үйлчилгээний газрын дарга Ж.Нарангэрэлээс тодрууллаа.
-Сүхбаатар аймгийн есөн иргэнд галзуугийн вакцин хийх ёстой байхад сүрьеэгийн вакцин маш өндөр тунгаар хийсэн гэсэн. Энэ хүмүүсийн биеийн байдал ямар байна вэ?
-Эрсдэл үүссэн есөн иргэн байгаа. Эрүүл мэндийн сайдын тушаалаар баг томилогдож ажилласан. Энэ багт нарийн мэргэжлийн олон эмч бий. Сүхбаатар аймагт биеийн байдлыг нь үнэлээд шаардлагатай шинжилгээнүүдийг нь хийгээд, мэргэжлийн салбар зөвлөл багууд ажиллаад эхний эмчилгээ оношлогоог Улаанбаатарт хийхээр авчирсан. Одоогийн байдлаар иргэдийн биеийн байдлыг дунд гэж оношлосон. Шаардлагатай нэмэлт шинжилгээнүүдийг хийсэн. Эмчилгээний горим эхэлсэн.
-Иргэд сүрьеэгээр өвдсөн үү, сүрьеэгийн эмчилгээ хийж байгаа юу?
-Энэ дээр нэгдсэн мэдээлэл өгөх арай эрт байна. Эмчилгээний хувьд сүрьеэгийн урьдчилан сэргийлэх тунгаар хийж байгаа. Сүрьеэгээр өвдөх үү, үгүй юү гэдгийг дүгнэлт өгсний дараа тодорхой хэлнэ. Одоогоор мэдээлэл өгөх боломжгүй.
-Вакцин өндөр тунгаар хийсэн нь цаашдаа иргэдийн эрүүл мэндэд ямар эрсдэлтэй вэ. Энэ тал дээр судалгаа хийж байгаа юу?
-Манай улсад өмнө нь ийм тохиолдол гарч байгаагүй. Эрүүл мэндийн сайд нэгдүгээрт, дэлхийн эрүүл мэндийн байгууллагаас зөвлөх эмч нарыг ажиллуулах хүсэлт, энэ ёсөн хүний эмчилгээ зургаан сар үргэлжилнэ, эмчилгээ дууссаны дараа хянах эмнэлзүйн эмч нарын багийг томилно. Хүүхдийн эмч, амьтнаас хүнд халдварладаг халдварт өвчний эмч, дүрс оношилгооны эмч, дотрын эмч багийг сайдын тушаалаар монголдоо хамгийн сайн эмч нарынг томилж байгаа. Эдгээр хүмүүс ХӨСҮТ дээр эмчилж байгаа бөгөөд дээр дурдсан эмч нар дүнэлт өгнө.
-Вакцин андуурч хийсэн хүнд хариуцлага тооцсон уу?
-Энэ асуудал Эрүүл мэндийн яаманд нэгдүгээр сарын 5-ны өдөр ирсэн. Бид 10 хоног тасралтгүй ажилласан. Газар дээр нь шуурхай баг очоод ажилласан байгаа. Тэр баг нь шуурхай нөхцөл байдлыг үнэлээд нөхцөл байдлыг Эрүүгийн цагдаагийн албанд хүргүүлсэн. Хэргийн шалгалтаар хэнд хариуцлага хүлээлгэх хэрэгтэй вэ гэдгийг тогтооно. Сайд тухайн аймгийн Засаг даргад бичиг хүргүүлсэн. Түүний дагуу тодорхой томилгооны өөрчлөлт хийгдсэн байгаа.
-Эрүүл мэндийн сайд эдгээр иргэдийг гадаад явуулж эмчилнэ, ДЭМБ-аас зөвлөмж авна гэж байсан. Энэ асуудал юу болсон бэ?
-ДЭМБ-д хандаагүй байгаа. Гадаад руу явуулахаар хэд хэдэн улс судалж байгаа. Дүгнэлт хэрхэн гаргахаас хамаарна. Гэхдээ сүрьеэг Монгол Улсад эмчлэх бүрэн стандарттай. Түүнд шаардлагтай оношлогоо эмчилгээний зүйлсүүд манай улсад байгаа учраас сүрьеэ гэдгээр нь эмчлэх боломжтой гэдэг тайлбараа өгсөн.
