Хөгжлийн Банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явц, байдлыг хянан шалгах түр хорооноос Нотлох баримтыг шинжлэн судлах сонсгол хоёр дахь өдрөө үргэлжилж байна.
"Империал Гоулд Майнинг" ХХК Баянхонгор аймгийн "Хүүшийн амны алтны шороон ордыг ашиглах" төсөлд зориулж уурхайд ашиглах техник худалдан авах зориулалтаар 2018 оны арваннэгдүгээр сард 16 тэрбум төгрөгийн зээл авсан.
Тус компаний зээлийн зориулалтын бус зарцуулалттай холбоотой асуудлаар Хянан шалгах түр хорооны дарга Б.Энхбаяр асуулт асууж, "Империал Гоулд Майнинг" ХХК-ны гүйцэтгэх захирал асан Н.Батмагнай хариулав.
-"Империал Гоулд Майнинг" ХХК авсан зээлийнхээ 7.39 тэрбум төгрөгийг зориулалтын бусаар зарцуулсан гэсэн дүгнэлттэй санал нийлж байна уу?
-Зээлийнхээ 7.39 тэрбум төгрөгийг зориулалтын бусаар зарцуулсан гэсэн дүгнэлтийн зарим зүйлд санал нийлнэ. Гэхдээ бид төлбөрөө 2019, 2020 онд төлсөн. 2021 онд цар тахал хэмээн түр зогссон. Манай зээлийн хугацаа 2022 оны наймдугаар сард дуусах байсан. Уул уурхайн лиценз нь байгаа, хангалттай нөөц нь тогтоогдсон байсан энэ бол цэвэр 100 хувийн бизнесийн зээл юм.
-Танайх анхнаасаа "Говь ассет менежмент" ХХК нь халхавч байдлаар тоног төхөөрөмж худалдан авах гэсэн агуулгаар мөнгийг шилжүүлсэн юм биш үү? Өөртөө мөнгийг татан төвлөрүүлэхээр тус компанийг ашиглаад байгаа юм биш үү, яагаад тэр өдрөө танайх руу тоног төхөөрөмж худалдан авах ёстой мөнгөө шилжүүлээд байгаа юм бэ?
-Тэр өдөр нь гэдгийг мэдэхгүй. "Говь ассет менежмент" ХХК-аас тоног төхөөрөмж худалдан аваагүй. Ямар нэгэн байдлаар бид худалдан авах гэрээ хийсэн. Урьдчилгаа мөнгө хийгээрэй гэсэн. Мөнгөө өгөхгүй байсаар байгаад хойшлуулсан. Нөгөөх маань борлуулалтын буцаалт хэмээн орж ирсэн.
