Хүүхдийн 100 мянган төгрөгийг 2023 онд үргэлжлүүлэн олгоход төсөвт 1.3 их наяд төгрөг суулгасан. Сангийн сайд Б.Жавхлангийн хэлснээр нийт хүүхдийн 91 хувьд олгох бөгөөд өрхийн орлогын түвшинд өндөр орлоготой хэсэг нь хүүхдийн мөнгөнөөс татгалзах боломжийг баталгаажуулж байгаа гэсэн.
Ийн өчигдрөөс /2023.01.16/ эхлэн хүүхдийн мөнгө авах эсэх талаарх мэссэж иргэдэд ирж, мэссэж аваагүй хэсэг нь e-mongolia.mn, ehalamj.mn зэрэг бүртгэлийн цахим системд хандаж өөрийнхөө мэдээллийг шалгав.
Гэтэл, “нууц” хүүхэд илэрсэн, үл хөдлөх хөрөнгө, машин нь хэд дахин үржсэн гэх мэт цахим монголын цаад нууц ил гарч ирэв. Өөрөөр хэлбэл, цахимжсан Монгол Улсын бүртгэлийн системийн “халтар” нууц ил гарав.
МАН-ын буюу Монгол Улсын Засгийн газрын 2020-2024 оны үйл ажиллагааны хөтөлбөрт
“2.5.6.“Цахим Монгол” арга хэмжээний хүрээнд хөдөлмөр, нийгмийн хамгааллын салбарыг бүхэлд нь цахимжуулж, иргэдэд үзүүлэх үйлчилгээг ил тод, шуурхай, хүртээмжтэй болгоно” хэмээн тусгасан байдаг. Ингээд тусгай яам, агентлаг хүртэл байгуулсан байдаг. Гэтэл энэхүү үйл ажиллагааны хөтөлбөрийг дүгнэхэд жил хүрэхгүй хугацаа үлдээд байхад хүүхдийн мөнгө олгох эсэх дуулианаар “Цахим Монгол”-д маш тодорхой дүн тавьчихлаа.
Жишээ 1.
Иргэн Б.П нь 65 насны босго алхсан 6 ач зээтэй өвөө. Гэвч өчигдөр өглөө насанд хүрээгүй 3 хүүхэдтэй, сард 300 мянган төгрөг авахаар болсон тухай мэссэж авсан.
Жишээ 2.
Иргэн Н.Т нь нэг оюутан, нэг бага насны хүүхэдтэй, түрээсийн байранд амьдардаг, ам бүл 4. Гэвч цахим бүртгэлээ шүүж үзвэл хоёр машинтай, ам бүл 2 амьдардаг болчихсон байв.
Жишээ 3.
Иргэн Н.С охиныхоо гэр бүлтэй хамт амьдардаг. Охин 4 хүүхэдтэй энгийн нэгэн гэр бүл. Гэвч өчигдөр 3 үл хөдлөх хөрөнгө, 4 машин жилийн орлого нь 50 саяаас давсан учраас зээ нар нь хүүхдийн мөнгөнөөс хасагдсаныг мэдэв.
Жишээ 4.
Иргэн Ц.Ш нөхөр 4 хүүхдийн хамт амьдардаг. Гэтэл хоёр хүүхэд эдний ам бүл дээр нэмэгдчихсэн байв.
Энэ мэт жишээ маш олон. Иргэд мэдээллийн зөрүүтэй байдлаас үүдэн энэ долоо хоногтоо нааш цааш гүйж, явдал чирэгдэл болох нь тодорхой. Тэгэхээр “Цахим Монгол” хэмээн уриалж байгаа ч төрийн дунд, доод түвшинд ажлын уялдаа холбооноос үүдэж гарч байгаа явдал чирэгдэлд хэн ямар хариуцлага үүрэх вэ.
Өрхийн бүртгэлээ зөв хийчихэж чадахгүй байгаа цахим монголчууд эрүүл мэндийг хэрхэн цахимжуулах бол гэхээс айдас түгшүүр төрж байна.
