-Зорчигч тээврийн онгоц Балбад газардах үедээ осолджээ. Одоо байгаа мэдээллээр онгоцонд 72 хүн байсан бөгөөд тэд бүгд нас барсан байна.-
Катмандугаас Похара руу нисч явсан Yeti Airlines компанийн ATR-72 онгоц ням гарагийн өглөө Балбын олон улсын нисэх онгоцны буудлаас холгүй газарт осолджээ. Онгоцонд 68 зорчигч, багийн дөрвөн гишүүн байжээ.
Одоогоор ослын газраас 40 хүний цогцсыг олсон гэж албаныхан мэдээлэв. Балбад суугаа ОХУ-ын Элчин сайд Алексей Новиков уг онгоцонд дөрвөн орос хүн байсан бөгөөд тэд бүгд нас барсныг баталжээ.
Онгоцны буудлаас ердөө нэг хагас километрийн зайд орших Сети голын хавцалд болсон ослын газарт Балбын армийн олон зуун цэрэг аврах ажиллагаанд оролцож байна.
"Бид зорчигчдын цогцосыг үргэлжлүүлэн хайсаар байна" гэж армийн хэвлэлийн төлөөлөгч Ройтерс агентлагт мэдээлсэн бөгөөд ослын үеэр онгоц хуваагдсан гэж нэмж хэлэв.
Балбын Ерөнхий сайд Пушпа Камал Дахал засгийн газрынхаа яаралтай хуралдааныг зарлаад байна.
Тодорхой байгаа мэдээллээр зорчигчдын 53 нь Балбын иргэд аж. Түүнчлэн Энэтхэгийн тав, Оросын дөрөв, Солонгосын хоёр иргэн байжээ. Мөн зорчигчдын дунд Ирланд, Австрали, Аргентин, Францаас тус бүр нэг хүн байжээ.
Балбад нисэх онгоцны осол нь тийм ч ховор биш юм. Нисэх зурвасууд ихэвчлэн уулархаг нутагт байрладаг бөгөөд уулын цаг агаарын огцом өөрчлөлт нь ялангуяа хөөрөх, буух үед нэмэлт аюулыг бий болгодог.
2022 оны тавдугаар сард Тара Эйр компанийн онгоц Балбын хойд хэсэгт осолдож, 22 хүн амиа алдсан юм.
2018 оны эхээр АНУ-Бангла нисэх онгоц Катмандуд газардах үедээ шатаж, 51 хүн амь үрэгдсэн зэрэг ослууд гарч байв.
Эх сурвалж: ВВС
