Энэ сарын 12-ны орой Оросын цэргүүд Соледар хотыг бүрэн хяналтад авсан гэж Оросын Батлан хамгаалах яам баасан гарагт мэдэгдэв.
Тус яамны мэдэгдэлд, Соледарыг бүрэн хянах нь Бахмут /Артемовск/ дахь Украины Зэвсэгт хүчний хангамжийн замыг таслах бөгөөд тэнд үлдсэн Украины армийн анги нэгтгэлүүдийг бүслэлтэд оруулах боломжийг олгоно гэж яамны мэдэгдэлд дурджээ.
Энэ бол Оросын талаас өгч буй иймэрхүү төрлийн анхны мессеж биш юм. Өмнө нь энэ хотыг эзэлсэн тухай Вагнер PMC-ийг үндэслэгч Евгений Пригожин зарласан бөгөөд хөлсний цэргүүд энэ бүс нутагт болж буй тулалдаанд идэвхтэй оролцож байна.
Өнөөг хүртэл барууны тагнуулууд Соледарыг Оросын арми эзэлсэн гэх баримтыг батлаагүй байгаа ч Америкийн Дайны Судлалын Хүрээлэн (ISW) сүүлийн тайландаа энэ нь үнэн байж магадгүй гэдгийг хүлээн зөвшөөрсөн байна.
“Оросын цэргүүд Соледар хотыг бүхэлд нь биш юмаа гэхэд ихэнхийг нь хянаж байгаа бөгөөд Украины цэргүүдийг хотын баруун захаас шахаж чадсан бололтой” гэж тайланд дурджээ.
Украины тал Соледар Оросын гарт байгааг үгүйсгэсээр байгаа ч Оросын арми эрчимтэй довтолж байгааг хүлээн зөвшөөрч байна.
Украины Батлан хамгаалахын дэд сайд Анна Малярын хэлснээр, өнгөрсөн шөнө Соледарт ширүүн тулаан болсон, Орос бараг бүх гол хүчээ Донецкийн чиглэлд шидсэн гэж тэр баасан гарагийн өглөө мэдэгдсэн юм.
Эх сурвалж: ВВС
