Спортын 15 холбооны нэгдэн Улсын Аварга Шалгаруулах Тэмцээн энэ сарын 13-22-нд "Мөсөн Өргөө" цогцолборт болно. Тус нэгдсэн УАШТ-д удаа анх оролцож буй дугуйн спортын холбоо зохион байгуулалтынхаа талаар өнөөдөр мэдээллээ.
Монголын дугуйн холбооны шүүгч Ц.Баярхүү "Спортын 15 холбооны УАШТ-д манай дугуйн холбоо анх удаа оролцож байна. Та бүхэн дугуйн спорт гадаа уралддаг, яаж танхимд зохиогдох бол хэмээн гайхаж магадгүй.
Цар тахалтай холбоотой дугуйн спортын технологи сайн хөгжсөн. Бүгдээрээ танхимд цуглаж, өөрсдийнхөө дугуйн дээр суугаад гар утасны аппликэйшнд хувийн үзүүлэлтүүдээ оруулна. Ухаалаг систем маань таны гаргаж буй энергийг тооцоолон, виртуал дугуйн зам дээр уралдуулах боломжтой болсон.
Тиймээс манай холбоо дугуйн спортын анхны виртуал УАШТ-ийг зохион байгуулна. Дугуйчид маань анх удаа мета ертөнцөд оноосон хугацаанд интернэтэд холбогдож, нэг зам дээр уралдана гэсэн үг юм" гэв.
Энэхүү тэмцээнд дэлхий даяар тархан суурьшсан монголчууд цахимаар оролцох боломжтой бөгөөд одоогоор 40 гаруй тамирчин бүртгүүлсэн байна.
Тус тэмцээнд оролцох дугуйчид 2015 оны ДАШТ зохион байгуулагдаж байсан АНУ-ын Ричмонд хотын зам дээр уралдах юм.
