Европын Холбоо /ЕХ/ Оросын байгалийн хийн импортоос хараат байдлаа багасгахын тулд Африкийн орнуудтай, тодруулбал, Ангол, Нигери, Сенегал улсуудтай эрчим хүчний салбарт хамтран ажиллахаар төлөвлөж байна гэж “Bloomberg” агентлаг ЕХ-ны баримт бичгээс эш татан даваа гарагт мэдээлжээ.
Тус агентлагийн мэдээлснээр, Оросын эрчим хүчний эх үүсвэрүүдээс хараат байдлыг бууруулах төлөвлөгөөг хэрэгжүүлэх багц арга хэмжээний хүрээнд Африкийн орнуудтай байгалийн хий нийлүүлэх хэлэлцээрийг Европын Комисс /ЕК/ энэ сард боловсруулж магадгүй байна.
ЕХ-ны орнууд байгалийн хийн 40 хувийг, нефтийн 27 хувийг, нүүрсний 46 хувийг ОХУ-аас авдаг байна. Оросоос нүүрс импортлохоо зогсоох саналыг ЕХ өнгөрсөн сард дэмжсэн бөгөөд энэ нь тус улсын эсрэг тав дахь багц хориг арга хэмжээний нэг хэсэг болсон юм. Хориг наймдугаар сараас хэрэгжиж эхэлнэ.
Montsame.mn
