Болсонарогийн дэмжигчид конгрессын байрыг эзлэв
Бразилийн экс ерөнхийлөгч Жаир Болсонарогийн олон мянган дэмжигчид өнгөрөгч амралтын Ерөнхийлөгчийн ордон, Конгрессын байр, Дээд шүүх рүү дайран орж, ерөнхийлөгчийн сонгуулийн дүнг цуцлахыг шаарджээ. Харин даваа гарагт тус улсын одоогийн эрх баригчид Засгийн газрын байруудыг эргүүлэн авч хяналтаа тогтоогоод байна. Орон нутгийн цагаар 18:30 цагийн орчимд хууль сахиулагчид гурван барилгыг дахин хяналтдаа авч чадсан гэж орон нутгийн телевизийн GloboNews мэдээлэв.
Дээд шүүх үймээн гарахаас урьдчилан сэргийлж чадаагүй хэмээн Нийслэлийн холбооны дүүргийн захирагч Ибанес Рошаг албан тушаалаас нь түдгэлзүүлсэн байна. Роша тус улсын удирдлагаас уучлалт гуйжээ. Нийслэлд өмнөх өдрөөс нь тогтоосон онц байдал нэгдүгээр сарын сүүл хүртэл үргэлжилнэ.
Юу болсон бэ?
Ням гарагт Бразилийн ерөнхийлөгч асан Жаир Болсонарогийн олон мянган дэмжигчид тус улсын Үндэсний Конгрессийн ордон руу дайран оржээ. Түүнчлэн Бразилийн Дээд шүүх, Ерөнхийлөгчийн ордон зэрэг барилгууд эсэргүүцэгчдийн шуурганд өртсөн байна. Үймээн самуун хэдэн цагийн турш үргэлжилсэн бөгөөд цагдаа нар ням гаригт 300 жагсагчийг баривчилсан гэж мэдэгдэв.
Тус улсын шинэ ерөнхийлөгч Лула да Силва тангараг өргөснөөс долоо хоногийн дараа Болсонаро болон түүний хэт барууны бодлогыг дэмжсэн жагсагчид төр, засгийн байр руу ийнхүү дайрчээ. Угаасаа Жаир Болсонарогийн дэмжигчид саяхны сонгуульдтүүний ялагдсаныг хүлээн зөвшөөрөхөөс татгалзаж байсан юм.
Үймээн гарсан тухайн өдөр Сан Пауло мужид ажлын айлчлал хийж байсан Лула да Силва "тус улсын түүхэнд ийм жишиг хэзээ ч байгаагүй" гэж мэдэгдэв.
Тэрээр мөн "Аюулгүй байдлыг зохих ёсоор хангаагүй гэж бид үзэж байна. Мөн үүнийг хийсэн бүх хүмүүсийг шийтгэнэ гэдгийг хэлмээр байна" гэжээ.
