Хятадад COVID-ийн эсрэг хязгаарлалтыг цуцалсны дараа тэргүүлэх зэргийн ахмад инженер, эрдэмтэд нас барсан бөгөөд энэ нь тус улсын шинжлэх ухааны салбарт байгаагүй тохиолдол юм гэж South China Morning Post сонинд бичжээ.
Арванхоёрдугаар сарын эхнээс Хятадын эрх баригчид коронавирусын халдвартай тэмцэх арга хэмжээгээ аажмаар зөөлрүүлж байна. Тиймээс нэгдүгээр сарын 8-наас эхлэн тус улсад ирж буй хүмүүсийг заавал шинжилгээнд хамруулах, тусгаарлах дэглэмийг цуцаллаа. Үүнтэй зэрэгцээд COVID-19-ийн өвчлөлийн урьд өмнө байгаагүй өсөлт ажиглагдаж байна. Зөвхөн хүнд нөхцөлд байгаа өвчтөнүүдийг эмнэлэгт хүргэж байгаа ч энэ нь эрүүл мэндийн системийг хэт ачаалахад хүргэж байна.
Хятадын Өвчний хяналтын төвийн ахлах эрдэмтэн асан Зенг Гуан Бээжингийн хүн амын 80 гаруй хувь нь коронавирусын халдвар авсан гэж тооцоолжээ.
Нийслэл хотод чөлөөнд гарсан ахмад настан эрдэмтэн, инженерүүдийн ихэнх нь амьдардаг.
Тухайлбал, энэ чиглэлээр тэргүүлэх эрдэм шинжилгээний байгууллагуудын нэг бол Инженерийн академи юм. Дэлхийн хамгийн том Гурван хавцлын усан цахилгаан станц, өндөр хурдны галт тэрэгний сүлжээ, Тяньгоны сансрын станц зэрэг Хятадын бараг бүх мега төслийн үзэл баримтлал, зураг төсөл, барилгын ажилд оролцсон 900 гаруй энэ академийн гишүүнчлэлтэй байдаг.
Тус академийн мэдээлснээр арванхоёрдугаар сарын 15-наас нэгдүгээр сарын 4-ний хооронд тус академийн 20 эрдэмтэн гишүүн нас баржээ. Харьцуулбал, 2017-2020 он хүртэл жилд дунджаар тус академийн 16 гишүүн нас барсан бол, 2021 онд нас баралт 13 хүн болж буурсан байна.
Цар тахлын улмаас нас барсан хамгийн залуу эрдэмтэн нь атомын цагны чиглэлээр мэргэшсэн 77 настай физикч Ти Тианчу, хамгийн ахмад нь 1950 онд Бээжингийн их сургуулийн эмнэлэгт Хятадын анхны хүүхдийн мэс заслын тасгийг үүсгэн байгуулсан 102 настай Жан Жинже юм.
Түүнчлэн, цөмийн хурдасгуурын реакторын хөтөлбөрийн ерөнхий инженер Шюй Ми, Хятадын анхны оптик утас бүтээгч Жао Зизэн, газрын ховор элементийн аж үйлдвэрийг үндэслэгч инженер Жан Гуочэн, лазерын зэвсэгт оруулсан хувь нэмрээрээ шинжлэх ухаан, технологийн үндэсний дээд шагналын хүртсэн Жао Инжун нарын нэр цуутай эрдэмтэд нас баржээ. Харин эдгээр тохиолдлын алинд нь ч тус академиас үхлийн шалтгааныг нэрлээгүй байна.
Бээжингийн томоохон эмнэлгийн нэрээ нууцлахыг хүссэн эмч тус сонинд ярихдаа, академич нар дэд сайд нартай ижил түвшинд хөнгөлөлттэй эмчилгээ авдаг. Гэвч сүүлийн үед эмнэлгийн тасгуудад хоосон ор огт байхгүй байгаа бөгөөд үүдний танхимд хэвтүүлсэн өвчтөнүүдийг азтайд тооцож болхоор байгаа.
Нэмж дурдахад цар тахал нь тус улсын нийгмийн эрүүл мэндийн тогтолцооны нөөцийг шавхаж, улмаар бусад өвчний эмчилгээг хойшлуулахад хүргэсэн гэж эмч нэмж хэлэв.
Нэрээ нууцлахыг хүссэн эрдэмтэн Хятадын шинжлэх ухаан, технологийн салбарт тахлын ерөнхий нөлөөллийг үнэлэхэд эрт байна гэжээ.
"Одоо манай хил дахин нээгдэж байна. Бид дэлхийн өнцөг булан бүрээс ирсэн хамтрагчидтайгаа уулзаж дахин шинэ санаа гаргаж, сонирхолтой төслүүд дээр нягт хамтран ажиллах боломжтой" гэж тэр хэллээ.
КОВИД-ийн эсрэг хязгаарлалтыг зөөлрүүлсэн хэдий ч Хятадад эпидемиологийн эсрэг хяналт дэлхийн хамгийн хатуу хяналтын нэг хэвээр байна. Гэсэн ч COVID-19-ийн өвчлөл эрс нэмэгдсэн. Арванхоёрдугаар сарын сүүлийн өдрүүдэд тус улсад өдөрт 37 сая хүртэлх халдвар бүртгэгдэж, сарын эхний 20 хоногт тэдний тоо 248 саяд хүрч магадгүй юм.
Эрх баригчид нөхцөл байдал хяналтанд байгаа гэж мэдэгдэж байгаа ч Хятадад хүнд хэлбэрийн өвчлөл нэмэгдэж байгаа нь ДЭМБ-ын гол санаа зовоосон асуудал болоод байна.
Эх сурвалж: РИА новости
