Мексикийн цагдаа нар үндэсний гвардын цэргийнхэнтэй хамтран хар тамхины картел Эль Чапогийн хүү Овидио Гузман-Лопезаг пүрэв гаригийн үүрээр Синалоа мужийн Кулиакан хотод баривчилжээ. Энэ үеэр болсон Буудлагын үеэр 29 хүн амиа алджээ. Түүнчлэн орон нутгийн агаарын тээврийн компанийн онгоцонд хэд хэдэн сум туссан гэх мэдээлэл байна.
Мексикийн Батлан хамгаалахын сайд Луис Кресенсио Сандовалын хэлснээр, Овидио Гузманыг баривчлах ажиллагааны үеэр гвардын 10 цэрэг, хар тамхины бүлэглэлийн гишүүн байж болзошгүй 19 хүн алагдсан байна. Өөр 21 хүнийг саатуулжээ.
Овидио Гузманыг баривчлах үеэр гудамжинд олон тооны машин шатжээ
Мексикийн Ерөнхийлөгч Андрес Обрадор хэлэхдээ, Мексикийн засгийн газар Эль Чапогийн хүүг АНУ-д яаралтай шилжүүлэн өгөх бодолгүй байна. Шийдвэрийг Мексикийн шүүгчид гаргана гэж хэлээд Гузман Лопезыг баривчлахад АНУ-ын цэргийнхэн оролцоогүй гэв.
Мексикийн Батлан хамгаалахын сайдын хэлснээр Овидио Гузманыг баривчлахаас өмнө түүнийг зургаан сарын турш нууцаар хянаж байсан гэв.
Гузман-Лопез эцгийнхээ үүсгэн байгуулсан "Синалоа" хар тамхины бүлэглэлийн салбарыг удирдсан хэрэгт буруутгагдаж байгаа аж. Энэ бол хар тамхины үйлдвэрлэл, хууль бус наймаатай холбоотой дэлхийн хамгийн том нууц байгууллагуудын нэг юм.
АНУ Гузман-Лопезийн талаар мэдээлэл өгсөн хүнд 5 сая долларын шагнал олгохоо зарлаж байв
Овидиогийн эцэг “Эль Чапо” (тогдгор ) Хоакин Гузманыг баривчлах ажиллагааг 2016 онд АНУ-ын эрх баригчдын дэмжлэгтэйгээр явуулсан бөгөөд одоо АНУ-ын шоронд бүх насаар хоригдох ял эдэлж байгаа юм. Харин сая баривчлагдсан гэмт хэрэгтнийг одоо тус улсын нийслэл Мехико хотод аюулгүй газар саатуулж байгааг тодотгов.
Өмнө нь Кулиакан хотын дарга Хуан де Диос Гамез твиттер хуудсаараа дамжуулан цэргийнхэн үүр цайсны хойш тусгай ажиллагаа явуулж, хотын олон зам гудамж, газрыг бүслэн хаасныг баталжээ. Тэрээр оршин суугчдыг гэрээсээ гарахгүй байхыг хүссэн гэдгийг тодотгов.
Хар тамхины картелийн хүүг баривчлах ажиллагааг ирэх долоо хоногт Мехико хотод болох Хойд Америкийн удирдагчдын дээд хэмжээний уулзалтад оролцох АНУ-ын Ерөнхийлөгч Жо Байден Мексикт хийх айлчлахын өмнө болсонгэдгийг хэвлэлүүд онцолж байна.
Эх сурвалж: ВВС
