Эдүгээ коронавирусын XBB.1.5 шинэ дэд хувилбар дэлхийн 30 гаруй улсад бүртгэгдээд байгаагийн дотор сүүлийн хоёр долоо хоногийн дотор халдварын тархалт нь хоёр дахин нэмэгджээ. Ялангуяа АНУ-ын зүүн хойд мужид олон хүн өвчлөөд байна. Түүнчлэн Их Британид хэд хэдэн тохиолдол аль хэдийн бүртгэгдсэн байна. XBB.1.5-ын талаар юу мэдэх хэрэгтэй вэ?
ХВВ.1.5 гэж юу вэ?
Энэ бол одоо дэлхий даяар давамгайлж байгаа коронавирусын шинэ дэд хувилбарын нэр юм. Өөрөөр хэлбэл 2021 оны сүүлээр гарч ирсэн Oмиркон хувилбарын өөр нэг шинэ вариант юм.
Халдвар судлалын мэргэжилтнүүдийн үзэж байгаачлан Omicron нь анхны хувилбаруудаас ч илүү халдварлах чадвартай олон дэд омгуудыг төрүүлсний нэг нь энэ ХВВ.1.5 аж.
XBB.1.5-ын шинж тэмдгүүд нь Omicron-ын өмнөх хувилбаруудын шинж тэмдгүүдтэй төстэй гэж үзэж байгаа ч яг тодорхой хэлэхэд эрт байна. Нийтлэг байгаа шинж тэмдэг нь ихэнх хүмүүсийн хувьд жирийн ханиадтай төстэй байдлаар илэрч байна.
XBB.1.5 нь хувилбар нь 2022 оны 9-р сард Их Британид анх бүртгэгдэж тархалт нь хурдан байгаа ч эрүүл мэндийн байгууллагууд үүнийг "санаа зовоосон" гэж ангилах хангалттай шалтгааныг олж чадаагүй байна гэжээ.
Лхагва гарагт Дэлхийн Эрүүл Мэндийн Байгууллага (ДЭМБ) өсөлт, тархалтын хувьд XBB.1.5 хувилбар нь өнөөг хүртэл эрдэмтдийн мэддэг вирусын бусад хувилбаруудаас илүү их хурдтай болохыг баталжээ.
Үүний зэрэгцээ энэ дэд хувилбарыг ердийн Omicron-аас илүү ноцтой эсвэл хор хөнөөлтэй гэж үзэх шалтгаан байхгүй гэдгийг ДЭМБ онцолж байна.
Энэ хувилбарын халдварласан хүмүүст үзүүлэх нөлөөг илүү сайн ойлгохын тулд XBB.1.5-ын халдварын лабораторийн шинжилгээ, эмнэлгийн мэдээлэл, статистик мэдээллийг сайтар хянаж байх болно гэдгээ ДЭМБ-аас баталжээ.
XBB.1.5 хаана илүү тархсан бэ?
Мэргэжилтнүүдийн тооцоолсноор АНУ-д коронавирусын халдварын 40 гаруй хувь нь XBB.1.5-аас үүдэлтэй бөгөөд энэ нь одоогоор тус улсад давамгайлсан хувилбар болж байна.
XBB.1.5 өнгөрөгч 12-р сарын эхээр нийт халдварын дөнгөж 4% -ийг эзэлж байсан бол одоо тархалтын эрчмээрээ Omicron-ын өмнөх хувилбаруудыг хурдан гүйцэж түрүүлээд байна.
Сүүлийн хэдэн долоо хоногт АНУ-д Ковид-19 халдварын улмаас эмнэлэгт хэвтэх хүмүүсийн тоо нэмэгдэж, тус улсын эрх баригчид вирусын шинжилгээг үнэ төлбөргүй хийх хөтөлбөрийг дахин хэрэгжүүлж эхэлжээ.
XBB.1.5 нь эрсдэлт бүлгийн хүмүүс, тэр дундаа дархлаа нь суларсан, вакцинд хамрагдах магадлал багатай хүмүүст үзүүлэх нөлөөний талаар санаа зовниж байна гэж мэргэжилтнүүд хэлжээ.
Халдвар судлаач профессор Хантер XBB.1.5 нь бусад Omicron хувилбаруудаас илүү аюултай байж болзошгүй гэсэн нотолгоог одоогоор олж хараагүй байна. Үүний дагуу одоогийн хувилбар нь бусадтай харьцуулахад өвчтөнийг эмнэлэгт хэвтүүлэх, үхэлд хүргэх боломж бараг байхгүй гэжээ.
"Инээдтэй нь хүн бүр Хятадад шинэ хувилбар гарч ирлээ гэж анхаарлаа төвлөрүүлж байгаа бөгөөд XBB.1.5 эхэлж АНУ-д гарч илүү тархалттай байгаа шүү дээ" гэж тэр тэмдэглэв.
Их Британи, АНУ зэрэг вакцинжуулалтын түвшин өндөр, өмнө нь халдварын хяналттай байсан орнуудад томоохон асуудал үүсгэхгүй байх магадлалтай. Гэсэн хэдий ч Лондонгийн Эрүүл ахуй, Халуун орны Анагаах Ухааны Сургуулийн профессор Дэвид Хейманн шинэ хувилбарын талаар судлах зүйл их байгаа гэв.
Эрдэмтдийн санааг зовоож буй зүйл бол удаан хугацааны хөл хорионоос болж вакцины эрэлт буурч, хүн амын дийлэнх нь вирусын эсрэг дархлаа сул хэвээр байгаа Хятад улс юм.
Профессор Хэйманн хэлэхдээ "Хятад улс вакцинд хамрагдаагүй хүн амд энэ хувилбар хэрхэн нөлөөлж байгааг харахын тулд халдвар авсан хүмүүсийн талаарх эмнэлзүйн мэдээллийг хуваалцах шаардлагатай байна." гэжээ.
Эх сурвалж: ВВС
