Америкийн улс төрийн хоёр дахь чухал албан тушаал болох Конгрессын доод танхимын даргын албан тушаалд нэр дэвшсэн Бүгд найрамдах намын Кевин Маккарти дахин шаардлагатай тооны саналыг авч чадсангүй. Конгрессын доод танхим сүүлийн 100 гаруй жилийн хугацаанд анх удаагаа даргаа сонгож чадахгүй ингэж бүтэлгүйтэж байгаа нь энэ юм.
Лхагва гарагт Төлөөлөгчдийн танхим спикерээ сонгох гэж гурван удаа оролдлогоо хийсэн бөгөөд тэр болгонд Бүгд найрамдах намын радикал бүлэг намын нэр дэвшигчээ дэмжихээс татгалзсан байна. Ингэснээр санал хураалтыг дахин хойшлуулахаар тогтлоо.
Ерөнхийлөгч асан Дональд Трамп намынхандаа уриалсан хэдий ч Бүгд найрамдах намын 20 гишүүн Маккартигийн төлөө бус харин Конгрессын гишүүн Байрон Доналдсын төлөө саналаа өгсөн байна.
Энэ жил доод танхимд Бүгд найрамдах намаас 222 хүн сонгогдон орж ирсэн бөгөөд Маккарти ялалт байгуулахын тулд дор хаяж 218 санал авах шаардлагатай.
Маккартигийн гол өрсөлдөгч, Ардчилсан намаас нэр дэвшсэн Хаким Жеффрис 212 санал авсан бөгөөд энэ нь танхим дахь Ардчилсан нам бүхэл бүтэн фракцаараа дэмжсэн гэсэн үг юм.
Төлөөлөгчдийн танхимын даргыг сонгох хүртэл хууль тогтоогчид бусад асуудлыг шийдвэрлэх боломжгүй. Тухайлбал, Конгрессын шинэ гишүүд тангараг өргөх боломжгүй, шинэ хууль батлах боломжгүй гацсан байдалтай байна.
Одоо дахиад хэдэн шатны санал хураалт явуулах нь тодорхойгүй байна. Энэ хэр удаан үргэлжлэх нь бас тодорхойгүй байна.
Тодотгоход, хамгийн сүүлд 100 жилийн өмнө буюу 1923 онд Төлөөлөгчдийн танхимын даргыг сонгох үеэр ийм нөхцөл байдал үүсч нэр дэвшигчийг сонгохын тулд есөн удаа санал хураалт явуулж байжээ.
Эх сурвалж: ВВС
