Монгол Улсын Засгийн газрын тухай хуульд Ерөнхий сайдын түр эзгүйд түүний үүргийг Монгол Улсын Шадар сайд гүйцэтгэнэ хэмээн заасан байдаг. Одоогтйн байдлаар Ерөнхий сайд Л.Оюун-Эрдэнийг Монгол Улсын Шадар сайд С.Амарсайхан орлож байна гэсэн үг.
Тэгвэл өнөөдрийн МАН-ын Удирдах зөвлөлийн хурлаар Засгийн газрын зарим томилгоог хэлэлцэн дэмжлээ. Тодруулбал, Эдийн засгийн хөгжлийн сайд Ч.Хүрэлбаатарыг Шадар сайдаар томилсон юм. Ингэснээр Ерөнхий сайдад С.Амарсайхан, Ч.Хүрэлбаатар нар шадарлах нь. Гэсэн ч Шадар сайд С.Амарсайхан Ерөнхий сайдын орлогч хэвээр байх бол шинээр томилогдсон Ч.Хүрэлбаатар сайд эдийн чиглэлийн асуудлаа хариуцах аж.
Тэгвэл тэдний эрхлэх ажлын хүрээнд доорх салбаруудыг хариуцуулахаар хуульчилсан байна. Үүнд:
Монгол Улсын Шадар сайд:
-гамшгаас хамгаалах асуудал;
-хойшлуулшгүй сэргээн босгох ажиллагаатай холбоотой шуурхай асуудал;
-стандартчилал, хэмжил зүйн асуудал;
-тохирлын үнэлгээний итгэмжлэлийн асуудал;
-шударга өрсөлдөөнийг дэмжих, хянан зохицуулах асуудал;
-хэрэглэгчдийн эрх ашгийг хамгаалах асуудал;
-төрийн болон орон нутгийн өмчийн хөрөнгөөр бараа, ажил, үйлчилгээ худалдан авах ажиллагаа;
-агаарын бохирдлын эсрэг үйл ажиллагаа хэрэгжүүлэх асуудал.
Монгол Улсын Шадар сайд бөгөөд Эдийн засаг, хөгжлийн сайд:
-үндэсний хөгжлийн бодлого, төлөвлөлтийг улс, салбар хоорондын болон бүс, орон нутгийн хэмжээнд нэгдсэн бодлого, уялдаагаар хангах, зээл, тусламжийн нэгдсэн бодлого;
-макро эдийн засгийн бодлогын судалгаа, төлөвлөлт;
-бүсчилсэн хөгжлийн бодлого;
-орон нутгийн хөгжлийн нэгдсэн бодлого;
-эдийн засгийн болон хөгжлийн тэргүүлэх чиглэл, салбарыг тодорхойлж, салбар, дэд бүтцийн зохистой харьцааг тогтоох, төслүүдийн нэгдсэн бодлого;
-хөрөнгө оруулалтын нэгдсэн бодлого, төлөвлөлт;
-эдийн засгийн гадаад хамтын ажиллагаа, гадаад, дотоод худалдаа, гадаадын хөрөнгө оруулалтын бодлого, зохицуулалт, бүртгэл;
-хөнгөн, жижиг, дунд, хүнд болон аж үйлдвэрийн нэгдсэн бодлого, төлөвлөлт;
-концесс, төр-хувийн хэвшлийн түншлэлийн асуудал;
-өндөр технологи, үндэсний инновацын тогтолцооны бодлого, төлөвлөлт;
-чөлөөт бүсийн хөгжлийн бодлого, төлөвлөлт;
-хүн амын өсөлтийг дэмжих, хүний хөгжлийг хангах нэгдсэн бодлого;
-хүн амын нутагшилт, суурьшлын ерөнхий төлөвлөлт.
