Засгийн газрын Хэрэг эрхлэх газраас сонгогдсон Төрийн албаны зөвлөлийн гишүүний бүрэн эрхийн хугацаа дуусгавар болжээ. Улмаар сул орон тоонд нэр дэвшигчийн сонгон шалгаруулалтыг өнөөдрөөс олон нийтэд нээлттэй зарласан байна.
Нэр дэвшигч нь Төрийн албаны тухай хуулийн 68.2-т заасны дагуу төрийн жинхэнэ албан тушаалд 15-аас доошгүй жил ажилласан, төрийн удирдлага, эдийн засаг, эрх зүй, боловсролын чиглэлээр мэргэшсэн дээд боловсролтой, ял шийтгүүлж байгаагүй, 45 нас хүрсэн Монгол Улсын иргэн байна.
Мөн улс төрийн намын удирдах, гүйцэтгэх албан тушаалтан болон сүүлийн нэг жилийн хугацаанд эдгээр албан тушаал хашаагүй байх, түүнчлэн Зөвлөлийн гишүүд нэг нутгийн болон нэг анги хамт төгссөн, эсхүл хамаарал бүхий этгээд байж болохгүй.
Эдгээр шалгуурыг хангасан нэр дэвшигчийн материалыг 2023 оны 1 дүгээр сарын 4-ний өдрөөс эхлэн 17-ны өдрийг дуустал Засгийн газрын Хэрэг эрхлэх газрын info@cabinet.gov.mn цахим хаягаар хүлээн авна.
