Засгийн газрын 2020-2024 оны ажлын хөтөлбөрт “Асгатын мөнгөний ордыг эдийн засгийн эргэлтэд оруулахад шаардлагатай туршилт, судалгаа хийж, хөрөнгө оруулалтын асуудлыг шийдвэрлэнэ” гэж тусгасан. Энэ дагуу 2019 оны нэгдүгээр сард Асгатын мөнгөний ордын тусгай зөвшөөрлийг “Эрдэнэс Монгол” ХК-д шилжүүлсэн билээ.
Уул уурхай хүнд үйлдвэрийн сайд Ж.Ганбаатар Асагтын мөнгөний ордын талаар хэлэхдээ “1996 онд ордын нөөцийг батлуулахдаа 6.4 сая тонн гэсэн боловч нэмэгдэх боломжтой нөөц 22 сая тонн гэж үзсэн байдаг. Манай яамнаас 22 сая тонныг баталгаажуулах үүргийг "Эрдэнэс Монгол"-д өгсөн. Энэ ордыг хөдөлгөх ёстой. Ингэхийн тулд хайгуул хийх замаар нөөцөө нэмэгдүүлэх шаардлагатай. Тогтоогдсон нөөц нэлээд эгц ууланд байдаг. 3000 орчим метрийн өндөрт байдаг гэсэн мэдээллийг өгч байгаа“ гэсэн юм.
"Эрдэнэс Монгол" компанийн Зэс, метал группийн дарга Х.Бадамсүрэн: Асгатын ордыг "Эрдэнэс Монгол" компани судалж байгаа. 1976 оноос судалгаа хийж, 1996 онд нөөцийг баталсан. Энэ ордыг яаж эдийн засгийн эргэлт оруулах вэ гэдэг санал гаргаад явж байгаа. Удахгүй "Эрдэнэс Монгол" компанийнхаа ТУЗ-д танилцуулна. Хайгуул ашиглалтын үйлдвэр барьж байгуулах замаар ордыг ашиглалт оруулах нь зөв гэж бодож байгаа. Эн ордод нэгд, нөөц өсгөх хайгуул хийх шаардлагатай. Хоёрт, гадаадын хөрөнгө оруулалтыг татвал Монгол Улсад томоохон орд боловч дэлхийн түвшинд аваад үзвэл жижиг ордод тооцогдоно. Хэрвээ бидний саналыг дэмжвэл ирэх оны нэгдүгээр хагасаас үйл ажиллагааг нь эхлүүлэх боломжтой гэж үзэж байгаа. Эдийн засгийн эргэлтэд оруулахад гадаадын хөрөнгө оруулалт шаардлагатай. Өмнө нь АНУ-ын компанитай хамтран ажиллах санамж бичигт гарын үсэг зурсан юм билээ. Бид энэ компанитай холбогдож, тэдний саналыг сонсож байгаа.
“Эрдэнэс Монгол” компанийн гүйцэтгэх захирал С.Наранцогт: Компанийн хувьд богино хугацаат өр төлбөрөө охин компаниудын хооронд бичилт хийх замаар 117 тэрбум төгрөгийн өрийг барагдуулсан юм билээ. Одоогоор 930 тэрбумын өртэй байгаа. Энэ бол тэтгэврийн зээл тэглэсэн өр. Тэтгэврийн зээл тэглэхийн тулд нэг их наяд гаруй төгрөгийн гурван бонд гаргасан. 2021 оны есдүгээр сард Trafigura компанитай гэрээ байгуулж 50 сая ам.долларын урьдчилгаа аваад гэрээ байгуулсан юм билээ. Энэ гэрээ нууцын зэрэглэлтэй байгаа. Ашгийн хувьд их асуудалтай гэрээ хийсэн юм билээ. Үүнээс Эрдэнэс-2, Эрдэнэс-3 нийт 215.5 тэрбум төгрөгийг барагдуулсан байна. Бондын 930 тэрбум төгрөгийн өргийг 2024 оноос төлж эхлэх учраас “Эрдэнэс Монгол” компани санхүүгийн асар их дарамттай байгаа.
Автозам, төмөр зам зэрэг дэд бүтцийн хувьд хүндрэлтэй, алслагдмал, төвийн эрчим хүчний шугамд холбогдоогүй, үйлдвэрлэлийн усан хангамж шийдэгдээгүй, баяжуулалтын технологи сонгогдоогүй зэрэг олон шалтгааны улмаас тус ордыг эргэлтэд оруулалгүй өдийг хүрсэн байна.
