УИХ дахь МАН-ын бүлгээс өнөөдөр мэдээлэл хийлээ. Уг мэдээллийн үеэр МАН-ын бүлгийн дарга Д.Тогтохсүрэн УИХ нэр бүхий дөрвөн гишүүний бүрэн эрхийг түдгэлзүүлэх эсэхийг Баасан гаригт хэлэлцээд татгазсан талаар сэтгүүлчдийн асуултад хариулахдаа "Өнгөрсөн Даваа гаригт Улсын Ерөнхий прокурорын газраас дөрвөн гишүүний бүрэн эрхийг түдгэлзүүлэх саналыг ирүүлсэн. УИХ-ын тухай хууль, Дэгийн тухай хуулийн дагуу уг асуудлыг хэлэлцээд, Халдашгүй байдлын дэд хороо хуралдаж 4 гишүүнээс тодруулга авсан. Халдашгүй байдлын дэд хороо мөрдөн байцаалтын үйл ажиллагаатай танилцах эрхтэй ганц хороо. Баасан гаригт уг асуудлыг УИХ хэлэлцсэн. УИХ гишүүдийг шалгуулахгүй гээгүй. Гишүүдийн бүрэн эрхийг түдгэлзүүлэхгүйгээр шалгах бүрэн боломжтой байна гэсэн дүгнэлтэд хүрсэн. УИХ-ын дэгийн тухай хуулиар гишүүдээс нууцаар цаасаар санал хураадаг. Тиймээс гишүүд өөрсдийнхөө итгэл үнэмшлээр дэд хороо болон байнгын хорооны санал дүгнэлтийг үндэслэж саналаа өгсөн байх." хэмээсэн юм.
Уг нь тэрбээр оны өмнөхөн 12-р сард болсон МАН-ын 30 дугаар Их хурлын даргалагчаар ажиллаж, хурлын дараа сэтгүүлчдэд мэдээлэхдээ: Сахилга хариуцлагыг дээшлүүлэх үүднээс авлига, албан тушаалын гэмт хэрэгт холбогдсон гишүүдтэй хэрхэн, яаж хариуцлага тооцох вэ гэдэг асуудлыг намын дүрэмд тодорхой болгож тусгасан.Тухайлбал, авлига, албан тушаалын гэмт хэрэгт холбогдвол намын гишүүнээс түдгэлзүүлнэ. Шүүхийн шийдвэрээр ял авсан бол намын гишүүнээс хасагдсанд тооцно. Тиймээс авлига, албан тушаалын гэмт хэргийн эсрэг МАН дүрэмдээ томоохон шинэчлэл хийлээ” хэмээж байсан билээ. Харин энэ удаад УИХ-аараа хэлэлцэж өөрийн намын 3, ардчилсан намын 1 гишүүнийг хамгаалан авч үлдлээ.
