УИХ-ын чуулганы нэгдсэн хуралдаанаар Дотоодын цэргийн тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг шийдэх үеэр ард иргэдийг цэрэгжилтэд бэлтгэх ажлын хамрах хүрээг нэмэгдүүлэх саналыг УИХ-ын гишүүн Ж.Чинбүрэн гаргаж Хууль зүй, дотоод хэргийн сайд Х.Нямбаатараас хариулт авав.
УИХ-ын гишүүн Ж.Чинбүрэн: Хуулийн төслийг дэмжиж байгаа. Ажлын хэсэг энэ саналыг төсөлд оруулаасай гэж хүсэж байна. Цэрэгжилтийн бэлэн байдлыг хангах чиглэлд төсөв суулгаж өгмөөр байх юм. Жишээ нь биднийг 10 жилд байхад автомат буу, гар бууг задалж буцааж угсрах, цэнэглэх зэргийг сургадаг байлаа. Ялангуяа дээд боловсролтой болж байгаа залуучууд тэр дотроо эмч, эмнэлгийн ажилчид цэрэгт явдаггүй учраас энэ талын мэдлэг дутмаг байна. Дэлхийн нөхцөл байдал амаргүй байгаа энэ үед Швейцарын иргэдээ цэрэгжилтэд бэлтгэдэг технологийг зөв юм байна гэж олон хүмүүс ярьдаг. Тэгэхээр Дотоодын цэргийн тухай хуулийн нэмэлт, өөрчлөлтөд энийг тусгах боломж бий юу. Иргэддээ цэргийн боловсрол олгох чиглэлд дотоодын цэргийн хүчийг дайчлах ийм санааг оруулж өгөхийг хүсэж байна. Хариулт өгнө үү.
УИХ-ын гишүүн, ХЗДХ-ийн сайд Х.Нямбаатар: Таны хэлж буй саналыг Батлан хамгаалах салбарын бодлогын баримт бичгүүд дээр илүү нарийн тусгаж явах ёстой. Швейцар, БНСУ гэх мэт улс орнууд хүн бүрийг цэрэгт татаж нэг талдаа эх оронч хүмүүжил олгодог. Бид өнөөдөр төсөв санхүүгийн нөхцөл байдлаас шалтгаалж нийт цэргийн насны залуусын тодорхой хувийг л зэвсэгт хүчин, хилийн цэрэг, дотоодын цэрэгт хугацаат цэргийн алба хаагчаар татаж цэргийн боловсрол эзэмшүүлж байна. Израйл улсад эрэгтэй, эмэгтэйгүй цэрэгт татаж, хүн бүрийг адил орчинд байлгаж, төлөвшил олгодог тэргүүн туршлагууд бий. Цаашид Батлан хамгаалах салбарын бодлогын баримт бичигт тусгаад залуучуудыг ялангуяа бүхэлд нь цэрэгт татаж хуарангийн амьдрал үзүүлж, суурь хүмүүжил олгох чиглэлд ажиллах ёстой гэж бодож явдаг.
