Орос улс залуу эрчүүдийн цэргийн алба хаах хугацааг хоёр жил хүртэл уртасгах төлөвлөгөөтэй байна. Дэд хурандаа Михаил Фотин зурагтаар ярилцлага өгөхдөө 18-27 насны залуусыг 2023 оны хавраас эхлэн нэг жил хагас, ирэх оны намрын татлагаас эхлэн хоёр жилийн хугацаатай цэргийн албанд татна гэж мэдэгджээ. Энэ нь ЗХУ-ын үеийн цэрэг татлагын тогтолцоог сэргээж буй явдал юм. Цэргийн албаны хугацааг 2008 оноос хойш нэг жил болгоод байсан билээ.
Харин Армид алба хаах хугацааг нэг жилээс хоёр жил болгон нэмэгдүүлэх тухай ОХУ-ын Батлан хамгаалах яамнаас мэдэгдэл хийгээгүй гэдгийг Кремлийн хэвлэлийн төлөөлөгч Дмитрий Песков сануулсан юм. Мөн Батлан хамгаалахын сайд Сергей Шойгу цэргийн алба хаах насны доод хязгаар 18 нас байсныг 21, дээд хязгаарыг 27-оос 30 нас болгон нэмэгдүүлэхээр төлөвлөж байгаагаа мэдэгдлээ. Түүний төлөвлөгөө хэрэгжвэл Оросын зэвсэгт хүчний тоог 1.5 сая цэрэг, гэрээт цэргийн дундаж тоог 695 мянгад хүрнэ.
