Нүүрсний хулгайтай холбоотой УИХ-ын нийтийн сонсголд оролцох гэсэн ч оруулсангүй хэмээн иргэд төрийн ордны гадна хувцсаа тайлж, нүцгэлэн, нэг цаг гаруй эсэргүүцлээ илэрхийлсэн билээ. Тэднийт цагдаа нар ирж, албадан эмнэлэг рүү хүргэсэн юм. Тэгвэл АТГ-ын эх сурвалжийн хэлж буйгаар тэднийг ТЕГ-ын дарга асан, генерал Б.Хурц болон УИХ-ын гишүүн Д.Бат-Эрдэнэ нар санхүүжүүлсэн мэдээ цахим ертөнцөнд гарсан юм. АТГ-аас хойшлуулашгүй ажиллагаа явуулж Б.Хурцыг баривчлах гэж буй гэнэ хэмээн шуугиж байсан боловч одоогоор Б.Хурцыг баривчилсан зүйл байхгүй ажээ. Энэ талаар тодруулахад Авлигатай Тэмцэх Газраас "Тагнуулын Ерөнхий Газрын дарга асан Хурцыг баривчилна" гэх мэдээллийг худал гэв.
Харин УИХ-ын гишүүн Д.Бат-Эрдэнэ сэтгүүлчдэд мэдээлэхдээ: "Би бизнес эрхэлдэг, үнэн. Бүх зүйл нээлттэй, нууцгүй байх ёстой. Бүх юм нь нээлттэй байвал монголчууд зөв хөгжинө. Тиймээс бүгдээрээ нээлттэй байя. Нээлттэй сонсголдоо идэвхтэй оролцоцгооё. Хуулийн байгууллагаас УИХ-ын гишүүний бүрэн эрхийг түдгэлзүүлж шалгана гэвэл болно, би зөвшөөрнө. Нүүрсний хулгайтай холбоотой гэх 17 улстөрчийн нэр дотор миний нэр орсон. Одоогоор хууль хяналтын байгууллагаас дуудаж шалгаагүй байна. Шалгуулахад би бэлэн. Намайг төрийн ордоны гадаа нүцгэлсэн залуусыг санхүүжиүүлсэн гэсэн мэдээ гарсан байсан. Эдгээр мэдээлэлийг өгсөн хүмүүсийг шүүх цагдаагаар шалгуулах хүсэлт гаргана” хэмээлээ.
