
“Tesla”, “SpaceX”, “Twitter” компаниудын тэргүүн Илон Маск энэ онд 122.6 тэрбум орчим ам.доллар алдагдал хүлээжээ.
И.Маскийн хөрөнгө 147.7 тэрбум орчим ам.доллароор үнэлэгдэж байгаа бөгөөд энэ нь сүүлийн хоёр гаруй жилийн хамгийн бага хэмжээ юм. “Tesla”-ийн хувьцаа 10 дугаар сараас хойших хамгийн доод түвшинд хүрч унасны улмаас И.Маск 7.7 тэрбум ам.доллар алдсан байна. Тэрбээр одоо “Bloomberg”-ээс гаргадаг тэрбумтнуудын жагсаалтад хоёрдугаарт бичигдэж байна. Мөн тэрбээр Твиттер хэрэглэгчдийн дунд явуулсан санал асуулгын дүнгээр тус компанийн гүйцэтгэх захирлын албан тушаалаасаа огцрохоор шийдвэрлэжээ.
Тэрээр ням гарагт өөрийгөө компанийн гүйцэтгэх захирлын албан тушаалаас огцруулах эсэх асуудлаар санал асуулга явуулахад 17,5 сая гаруй оролцогчийн 57,5 хувь нь дэмжсэн байна.
Тэрбумтнуудын жагсаалтыг LVMH (Louis Vuitton Moet Hennessy) группийн ерөнхийлөгч Бернар Арно 161 тэрбум орчим ам.доллароор үнэлэгдэх хөрөнгөөрөө тэргүүлж байна.