ОХУ-ын Ерөнхийлөгч Владимир Путин Даваа гарагт Минск хотод хүрэлцэн ирж, Александр Лукашенкотой хэлэлцээ хийв. Путин гадаадын ямар ч удирдагчтай ингэж олон удаа уулздаггүй, ялангуяа дайны үед. Гэхдээ энэ удаагийнх 2019 оноос хойш Беларусийн нутаг дэвсгэрт хийсэн анхны уулзалт юм. Харин Лукашенко бол ОХУ-д дахин дахин айлчилдаг. Зөвхөн 2022 онд тэрээр Орост долоон удаа айлчилсан.
Тэд юу ярив?
Путин, Лукашенко нарын яриа хэлэлцээ хоёр цаг хагас орчим үргэлжилсэн байна. Уулзалтын эхэнд ОХУ-ын Ерөнхийлөгч эдийн засгийн талаар голчлон ярилцана гэж мэдэгдсэн бол үүний дараа хийсэн хэвлэлийн бага хурал дээр эрчим хүчний үнэ гэсэн гол асуудлыг шийдэж чадлаа гэв.
Орос улс Беларусьт газрын тос, байгалийн хийг "маш таатай, хөнгөлөлттэй нөхцлөөр" нийлүүлдэг гэж Путин сануулахаа мартсангүй, эрчим хүчний салбарын үнэ тогтоох "эмзэг" параметрүүдийг тохиролцсон гэж мэдэгдэв. Гэхдээ хоёр удирдагчийн хэн нь ч энэ талаар тоо дурдсангүй.
Орос, Беларусь улс байнгын цэргийн сургуулилтиа үргэлжлүүлэх болно, мөн тэд цэргийн шинэ техник бүтээхээр тохиролцсон бөгөөд ирэх жил Беларусийн сансрын нисгэгч Олон улсын сансрын станц руу нисэхээр төлөвлөж байна гэж Путин хэлэв.
Нэмж дурдахад тэрээр Беларусийн байлдааны нисэх онгоцны багийнхныг "тусгай цэнэгт хошуутай сумыг агаараас хөөргөх"" дадлагад сургаж байгаагаа зарлав. Оросоос шилжүүлсэн С-400, Искандер цогцолборуудыг Беларусийн нутаг дэвсгэрт байлдааны үүрэг гүйцэтгэсэн гэж Лукашенко мэдэгдэв.
В.Путины энэ айлчлалыг Украин дахь байлдааны ажиллагаанд Беларусь оролцох асуудлыг шийдвэрлэхээр явж байна гэсэн мэдээллийг "тэнэг бөгөөд үндэслэлгүй" гэж үзэх ёстой гэж Кремлийн хэвлэлийн төлөөлөгч Дмитрий Песков яриа хэлэлцээ эхлэхээс өмнө мэдэгдэв.
Путины Минскт хийсэн ажлын айлчлал нь Москвагийн найдвартай холбоотон гэж нэрлэж чадах цорын ганц хүн хэвээр байгаа Лукашенког сайшааж буйн илрэл гэж улс төр судлаачид үзэж байна.
Барууны шинжээчид цэргийн ажиллагааг Путин, Лукашенко нарын уулзалтын гол сэдвүүдийн нэг гэж үзсэн ч сэтгүүлчид дайны талаар асуулт асуугаагүй. Тодруулбал, Америкийн Дайны Судлалын Хүрээлэнгийн шинжээчид энэ айлчлалын үеэр Путин хоёр орны интеграцчлалд хөнгөлөлт үзүүлэхийн тулд Украин руу шинэ дайралт хийх нөхцөлийг бүрдүүлэх асуудлаар Беларусийн Ерөнхийлөгчид шахалт үзүүлэхийг оролдох болно гэж бичжээ. Гэхдээ зарим шинжээчид Москва Минскийг Украины эсрэг дайнд ажиллагаанд оролцуулах магадлал тун бага гэж үзэж байна.
Эх сурвалж: ВВС