Зэвсэгт хүчний 256 дугаар ангийнхан хугацаат цэргийн алба хаагчдынхаа дунд ар гэртээ “Захидал бичээрэй” аяныг тогтмол хэрэгжүүлж байна. Энэ нь хугацаат цэргийн алба хаагчдынхаа бичгийн боловсролыг дээшлүүлэх, захидал харилцааны хэрэглээг нь нэмэгдүүлэх зорилготой аж. Тэд 14 хоног тутамдаа гэр бүлтэйгээ дүрсээ харах болон утсан холбоогоор ярилцаж, хүссэн үедээ захидал бичих нь нээлттэй байдаг гэнэ.
Дайчдын дундаас хамгийн олон захидал бичээд байгаа нь байлдагч Батсайханы Батхүлэг. Байлдагч Б.Батхүлэг Баянхонгор аймгаас хугацаат цэргийн албанд татагдсан бөгөөд 2018-2022 онд “Их засаг” их сургуулийг эрх зүйч мэргэжлээр суралцаж төгссөн залуу.
Сургуулиа төгсөөд л хугацаат цэрэгт ирэх болсон нь хоёр шалтгаантай гэнэ. Нэгдүгээрт, Үндсэн хуульд заасан иргэний цэргийн үүргээ биелүүлэх. Бүр тодруулбал, энэ хорвоод эр хүн болж мэндэлсний хувьд хугацаат цэрэг хэмээх мэдрэмжийг өөрийн биеэр туулж, сайхан дурсамж бүтээх гэнэ. Хоёрдугаарт, төрийн албанд эрх зүйч мэргэжлээрээ ажиллах сонирхолтой байгаа учир хугацаат цэргийн албаа хаах нь зүй ёсны хэрэг байж.
Тэрээр хайртай гэр бүлдээ илгээсэн захидлынхаа тухай өгүүлэхдээ “Би захидал гээчийг сурагч бас оюутан болоод төдийлөн анзаарч байсангүй. Бидний үеийнхэн чинь сошиал орчноос “зүүгдсэн”, сайн, муу мэдээллийн урсгалд хэтэрхий автаж, ёстой нөгөө хэтэрхий соёлжсон гэмээр цагаан гартнууд шүү дээ. Тэр утгаараа би ч гэсэн цэрэгт ирэхээс өмнө гар утсанд донтсон, аливаад төвлөрч суух, бодох нь багассан байж.
Үүнийг энд ирснээрээ мэдлээ. Аав, ээж, гэргийдээ захидал бичихдээ амаараа хэлээгүй нарийн нандин үгсийг холбож, тэднийг цаг үргэлж хайрладгаа өгүүлбэрээр илэрхийлэх нь амттай сайхан мэдрэмж юм. Манай ангийн танкийн батальоны соёл хүмүүжлийн офицер, ахмад А.Цэгмэд дарга маань ч гэсэн бидэнд захидалдаа юу гэж бичих, аав, ээжийгээ хэрхэн баярлуулах талаар үргэлж зааж өгдөгт нь баярладаг юм” гэж байна. Байлдагч маань эхнэр Х.Болортунгалагт 10, аав Ж.Батсайхан, ээж С.Сарангэрэл нартаа гурван захидал бичсэн гэнэ. Захидал бүртээ өөр өөр зүйлийн тухай өгүүлж, шинэлэг байдлаар бичдэг бөгөөд ирэх хариуг нь ч тэсэн ядан хүлээдэг ажээ. Хамгийн сайхан мэдээ нь тэр шинэ оны босгон дээр аав болох гэнэ. Түүний гэргий Х.Болортунгалаг “Их засаг” их сургуулийн эрх зүйн ангид суралцдаг, тун удахгүй нярайлах юм байна. Гэргий нь захидалдаа өөрийнхөө зургийг угаалгаж хавсаргахын зэрэгцээ бяцхан үрээ хүлээн авах бэлтгэлээ хэрхэн хангасан талаараа өгүүлдэг гэж байна. Удахгүй мэндлэх бяцхан үрийнхээ нэрийг бодоод олчихсон, төртөл нь хэнд ч хэлэхгүй гээд тэр аз жаргалтай нь аргагүй инээмсэглэв.
Цэргийн албаныхаа хуучлахдаа “Энд боломж дүүрэн байна. Нэг жилийн хугацаанд өөрийгөө бүх талаар хөгжүүлэх нь нээлттэй юм. Би гэхэд халагдаж очоод төрийн албаны шалгалт өгөхийн тулд цэргийн хуарандаа өөрийгөө бэлтгэж эхлээд байна. Ангийн удирдлага, хамт олон ч уриалгахан хүлээн авч, боломжийг нь бүрэн хангаж өгсөн” гэв.
Тэр бас хугацаат цэргийн албанаас халагдаад гэр бүлтэйгээ Баянхонгор аймагтаа ажиллаж амьдрах бөгөөд хөдөө сайхан амьдрал байдгийг залууст үлгэрлэн харуулах зорилго тавьжээ. Үргэлж эерэг хандлагатай, инээмсэглэж явдаг нь байлдагчийн гадаад гоо сайхан бол дотоод сэтгэлдээ цэргийн алба, гэр бүлээ хайрлаж, амьдралын зөв хэвшлийг эрэлхийлсэн нь хоромхон төдий ярилцахад тодоос тод мэдрэгдэх.
Ахмад Д.БОЛОР
