"Бодь интернэйшнл" группийн үүсгэн байгуулагч Д.Баясгалан өнөөдөр олон нийтэд хандан мэдээлэл хийлээ.
Учир нь Засгийн газрын шийдвэрээр ЭТТ ХК-д холбогдох оффтейк гэрээнүүдийг ил болгосон. Үүнд Гашуунсухайт чиглэлийн болон Богдхан төмөр замыг "Бодь интернэйшнл" ХХК-ийн гүйцэтгэлээр барих хэд хэдэн гэрээ багтсан юм.
Өнгөрсөн хугацаанд Засгийн газраас нууцаар хийгдсэн болон олон хууль бус үйлдэл буюу албан тушаалын давуу байдал, мөнгө угаасан байж болзошгүй хэргүүдэд холбогдох 5 оффтэйк гэрээг Д.Баясгалантай хийсэн нь анхаарал татдаг. Иймээс тэрээр өнөөдөр олон нийтэд хардагдаж улс төрийн нөлөөллөөр гэрээлсэн байх үндэслэлтэй, авлигал өгөх, мөнгө угаасан, хууль бус гэрээ хийж, түүнийгээ улсын нууцад оруулах замаар мөрөө балласан зэрэг Эрүүгийн хэргүүдэд шалгагдаж байгаа билээ.
Д.Баясгалангийн "Бодь интернэйшнл" группийн хийсэн гэрээ бүрийг шалгах нь зүй хэрэг.
Гэтэл тэрээр гэрээнүүдийнхээ бүхий л архив материалыг устгасан гэх онц ноцтой мэдээлэл байгаа юм. Эх сурвалжийн мэдээлснээр, "Бодь интернэйшнл" группийн сүлжээ хариуцсан ажилтан нь хууль бус гэрээнүүдтэй холбоотой байгууллагын бүхий л санах ой буюу /хаард диск/-ийг устгасан байна.
Тэр ч бүү хэл нууцын гэгдэх өрөөнд хадгалаатай байсан гэрээнүүдийн бүхий л баримт, бичгүүдийг устгаж улмаар оргон зайлжээ. Түүнчлэн тус ажилтан нь байгууллагын бүхий л мэйл хаягт буй датаг устгаж, ул мөрөө балласан аж. Ийнхүү үндсэндээ гэрээнүүдтэй холбоотой бүхий л баримт устсан.
Гэхдээ нэг ажилтан үүнийг хийх боломжгүй бөгөөд Д.Баясгалангийн тушаалаар хийсэн нь илт. Мөн Засгийн газраас ажлын хэсэг гарч бүхий л гэрээнүүдийг шалгаж эхэлсэн гэх мэдээллийн дагуу шалгуулах дээрээ тулсан Д.Баясгалан айж, ул мөрөө баллаж эхэлсэн. Нууц гэгдэж байгаа 5 гэрээ хийгдэх үеэр А.Амундра гүйцэтгэх захирлаар ажиллаж байсан бөгөөд гэрээний хэлтсийн даргаар н.Хосбаяр гэх хүн ажиллаж байжээ.
Одоогоор тус компанитай хийсэн бүхэл бүтэн 5 оффтэйк гэрээний мэдээллийг шалгах боломжгүй нөхцөл байдал үүссэн гэсэн үг. Тэгэхээр цаашид Д.Баясгалантай хийсэн 5 оффтэйк гэрээг үнэн зөвөөр шалгаж тогтоох нь замхрах шатандаа орсон гэх хардлагыг төрүүлж байна.
Эх сурвалж: Asu.mn
