УИХ дахь МАН-ын бүлэг өнөөдөр хуралдаж дууслаа. Хурлаар цаг үеийн нөхцөл байдал, үүсээд байгаа асуудал , цаашид авч хэрэгжүүлэх үйл ажиллагааны талаар хэлэлцжээ.
Өнөөдрийн бүлгийн хурлаас дараах хоёр шийдвэрийг гаргасан байна.
Нэгдүгээрт: Төрийн өмчит компаниудын менежментийг сайжруулах, засаглалыг сайжруулах зайлшгүй шаардлага үүссэн. Иймд энэ намрын чуулганаар Төрийн болон орон нутгийн өмчит компанийн тухай хуулийн төслийг хэлэлцэн батлах нь зүйтэй хэмээн үзэж, ажлын хэсэг яаралтай гаргаж ажиллуулахаар шийдвэрлэсэн аж.
Хоёрдугаарт: Үндэсний хэмжээнд нийгмийн бүхий л талуудыг хамруулсан Нийгмийн зөвшилцлийн үндэсний чуулганыг зохион байгуулахаар тогтсон. Энэ чиглэлээр УИХ, Засгийн газрын хамтарсан ажлын хэсэг гарч ажиллах юм байна.
Өнөөдрийн бүлгийн хуралд МАН-ын дарга, Ерөнхий сайд Л.Оюун-Эрдэнэ оролцож мэдээлэл өгчээ. Хуралдааны дараа УИХ дахь МАН-ын бүлгийн дарга Д.Тогтохсүрэн мэдэгдэл хийхдээ "Нүүрсний асуудалд нэр холбогдсон хүмүүс шалгуулъя гэдэг дээр санал нэгдсэн байгаа. Цаашдаа нэр нь зарлагдаагүй ч шалгуулах тохиолдол гарахыг үгүйсгэхгүй. Прокурор, АТГ, Тагнуулын хамтарсан ажлын хэсэг ажиллаж байгаа. Өнөөдөр намын дарга бүлгийн хурал дээр бүлгийн гишүүд ямар нэгэн асуудалд холбогдвол бүгд шалгуулна гэдэг чиглэл өгсөн" гэв.