Нүүрсний хулгайн хэрэгт нэр холбогдож АТГ-т шалгагдаж буй Ерөнхийлөгч асан Х.Баттулга хувийн баталгаа гаргуулж БНСУ руу явсан гэх асуудлаар УИХ-ын гишүүн Т.Доржханд мэдээлэл хийлээ.
Тэрбээр “Ийм мэдээлэл хийж байгаадаа харамсаж байна. Иргэд маань гадаа жагсаж, хариуцлага тооцохыг шаардаж байтал энэ хэрэгт хамгийн их холбоотой хүн өчигдөр хилээр гараад явчихжээ. Эрдэнэт үйлдвэрийн 49 хувь, Дубайн гэрээг буруу байгуулсан асуудалд холбогдсон Ерөнхий сайд байсан Ч.Сайханбилэг гэдэг хүн яг ингээд явж байсан. Гэтэл чоно борооноор гэдэг шиг нүүрсний хулгайн нууц гэрээг шахаж батлуулж байсан ҮАБЗ-ийн тэргүүн, Монгол Улсын Ерөнхийлөгч асан Х.Баттулга өчигдөр хилээр гараад явчихсан байна.
2022.12.21-ний өдөр нүүрсний асуудлаар нээлттэй сонсгол хийх саналыг би гаргаж байсан. Энэ гурав дахь өдөр нээлттэй сонсгол хийхээр ажиллаж байгаа. Энэ хэрэгт холбогдолтой албан тушаалтан, улс төрчид, нэр нь зарлагдаад байгаа 17 нөхдийг бүгдийн авч ир гэдэг хүсэлтийг тавьсан. Тухайлбал Х.Баттулга гэдэг хүнээс мэдүүлгийг нь авъя. “Эрдэнэс Тавантолгойн” ХК-ийн захирал Б.Ганхуягаас ямар улс төрчид өөрийг чинь шахсан юм бэ гэдгийн сонсъё. Жинхэнэ хулгайчдыг зарлана гэж байгаа УИХ-ын 5 гишүүнээс мэдээлэл авъя гэж төлөвлөж байсан. Гэтэл эхнээсээ зугтаачихлаа. Үндэслэл нь эрүүл мэнд. Ч.Сайханбилэг гэдэг хүн эрүүл мэндийн шалтгаанаар зугтааж байсан.
АТГ шалгаж байгаа хүмүүстээ хилийн хориг тогтоо. Энэ хулгайч нар чинь гараад явчих юм бол өвлийн хүйтэнд жагсаж байгаа иргэдийн хүлээлт юу болох вэ. Иргэдийнхээ өмнө нь эр зоригтойгоор асуудлаа ярьж чадахгүй улс төрчид байна шүү дээ. Тийм учраас шаардлага тавьж байна. Одоо хэнд хариуцлага тооцох вэ. АТГ босоо удирдлагатай. Тийм учраас АТГ-ын удирдлагад хариуцлага тооц, хэрвээ прокурор хариуцлага алдсан бол Ерөнхий прокурорт хариуцлага тооцоо. Хамсаатнаа явуулсан гэж ойлгогдоод байна” гэв.
