ОХУ-д хандсан ес дэх удаагийн хориг болон Оросын газрын тосны үнэд дээд хязгаар тогтоох Европын комиссын саналыг Европын холбооны гишүүн орнуудын удирдагчид баталлаа. Гэхдээ байгалийн хий худалдан авах үнэд дээд хязгаар тогтоох асуудлаар Европын холбооны гишүүн орнууд тохиролцоонд хүрч чадаагүй, гишүүн орнуудын эрчим хүчний сайд нар ирэх долоо хоногт уг асуудлыг дахин авч хэлэлцэнэ хэмээн Европын зөвлөл энэ сарын 15-ны орой мэдэгдэв.Европын комисс өмнө нь ОХУ-д тавих ес дэх удаагийн хоригийн төслийг нийтлэхдээ тухайн хоригт хамаарах хувь хүн, байгууллагын нэрсийн жагсаалт гаргаж, экспортын хяналтын шинэ арга хэмжээ хэрэгжүүлэхийн зэрэгцээ ОХУ-д дрон зарахыг хориглохыг шаардсан юм. Холбогдох хоригт бас Оросын телевизийн 4 сувгийн нэвтрүүлгийн цацалтыг зогсоох, Оросын эрчим хүч, уурхай ашигт малтмалын салбарт эдийн засгийн илүү чангаруулсан хориг тавих санал ч багтсан юм.АНУ-ын Төрийн нарийн бичгийн дарга Антони Блинкен энэ сарын 15-нд гаргасан мэдэгдэлдээ: Оросын олигархи Владимир Потанин хийгээд түүний гэр бүлийнхэнд АНУ-ын Төрийн департамент, Сангийн яам хориг тавих бөгөөд түүний нэгэн хөрөнгө оруулалтын компани, банканд хориг тавина. АНУ-ын Төрийн департамент нь ОХУ-ын төмөр замын хувьцаат компанийн төлөөлөн удирдах зөвлөлийн 5 гишүүнд ч хориг тавив. АНУ-ын Сангийн яам нь ОХУ-ын гадаад худалдааны банкны дэргэдэх нийт 17 салбар байгууллагад хориг тавьсан бөгөөд энэ банк нь энэ оны 2-р сард АНУ-ын Сангийн яамны хоригийн жагсаалтад орсон юм гэжээ.