Байдены засаг захиргаа агаарын удирдлагагүй бөмбөгийг Оросын цэргийн байрлалыг өндөр нарийвчлалтайгаар цохих чадвартай "ухаалаг" бөмбөг болгон хувиргах дэвшилтэт электрон тоног төхөөрөмжийг Украинд илгээхээр төлөвлөж байна гэж "Вашингтон Пост" АНУ-ын өндөр албан тушаалтнуудаас иш татан мэдээлжээ .
Энэхүү электрон иж бүрдэл нь байршил тогтоох төхөөрөмжийг багтаасан бөгөөд төрөл бүрийн зэвсгүүдэд залгаж угсрах боломжтой гэдгээрээ давуу талтай. Энэ төхөөрөмжийг Пентагон "Шууд довтолгооны хам сум" буюу JDAM гэж нэрлэдэг. АНУ-ын арми энэ технологийг 900 кг хүртэл жинтэй агаарын бөмбөгт ашигладаг.
"Вашингтон Таймс" сонинд "Ерөнхийлөгч Байден эсвэл түүний үндэсний аюулгүй байдлын шилдэг зөвлөхүүд JDAM-ыг Украинд шилжүүлэхийг зөвшөөрсөн эсэх нь одоогоор тодорхойгүй байна" гэж тэмдэглэжээ.
Эдгээр иж бүрдлийг Украины Зэвсэгт хүчний арсеналаас ямар системд ашиглах нь одоогоор тодорхойгүй байна.
Украины Агаарын цэргийн хүчин ЗХУ-ын үеийн хуучирсан МиГ онгоцуудад ихээхэн найдаж байгаа бөгөөд Пентагон нисгэгч болон засвар үйлчилгээний иж бүрэн сургалт шаарддаг барууны шинэ нисэх онгоц нийлүүлэхийн оронд тэдгээр хуучин онгоцыг шинэчлэхийг эрэлхийлж байна.
АНУ өмнө нь Украины армийн агаарын цохилт өгөх чадварыг нэмэгдүүлэхийн тулд Украинд дэвшилтэт зэвсэг, тэр дундаа агаараас харвах HARM өндөр хурдны пуужингуудыг нийлүүлж байсан. Гэхдээ энэ зэвсэг нь GPS-ийн удирдамж бүхий JDAM-аас өөр юм.
Украин зургадугаар сараас хойш өндөр нарийвчлалтай HIMARS системийг ашиглаж байгаа нь Оросын зэвсэгт хүчинд ихээхэн хохирол учруулж, хангамжийн шугам тасалдахад хүргэсэн.
Түүнчлэн мягмар гарагт АНУ-ын агаарын довтолгооноос хамгаалах хамгийн дэвшилтэт хүчин чадал бүхий "Патриот" агаарын довтолгооноос хамгаалах системийг Украинд өгөхөөр бэлтгэж байгааг АНУ-ын өндөр албан тушаалтнууд баталсан юм
Эх сурвалж: ВВС